Evaọ oke nọ u kpemu, ebe mai e ta nọ Jerusalẹm oke anwae nọ ahwo riẹ a nyasiọ Ọghẹnẹ ba na o dikihẹ kẹ Kristẹndọm. Eware etọtọ nọ e jẹ via evaọ Jerusalẹm oke yena, wọhọ edhọgọ gbe ogbekuo nọ i je titi evaọ eva riẹ, o kareghẹhọ omai eware nọ e be via evaọ Kristẹndọm. Rekọ, anwọ ikpe jọ ze na, evaọ ebe mai, te ọnana nọ who bi se na, ma gbẹ be ta kpahe oware jọ evaọ eruẹaruẹ no kẹsena ma vẹ fodẹ oware nọ u dikihẹ kẹ hẹ, ajokpanọ Ebaibol na o dhesẹ ere vevẹ. Kọ oware jọ o rrọ Ikereakere na nọ ma rẹ rọ ta nọ Jerusalẹm o dikihẹ kẹ Kristẹndọm? Ijo.

Roro kpahe eware nana: Evaọ oke jọ, Jerusalẹm ọ jọ ehri egagọ efuafo; rekọ uwhremu na, ahwo nọ a jẹ rria Jerusalẹm a tẹ nyasiọ Ọghẹnẹ ba. Wo ohẹriẹ, egagọ Kristẹndọm i ri wobọ evaọ egagọ efuafo ẹdẹvo ho. Anwọ ikpe-udhusoi avọ ene C.E. ze nọ egagọ Kristẹndọm i ro muhọ na, iwuhrẹ erue ọvo a bi wuhrẹ.

U te no ere no, nọ ahwo Babilọn a raha Jerusalẹm no, Jihova ọ wariẹ jẹ okpẹwho na rehọ, o tẹ wariẹ jọ ehri egagọ uzẹme. Rekọ, Kristẹndọm o ri wo ọjẹrehọ Ọghẹnẹ ẹdẹvo ho, yọ nọ a tẹ raha iẹe no evaọ etoke uye ologbo na ọ te gbẹ jọ ofa ha.

Eme eware nọ ma ta no na kpobi i dhesẹ? Nọ ma tẹ kiẹ epanọ eruẹaruẹ Ebaibol i ro rugba kpahe Jerusalẹm aghẹmeeyo na, ma sae ta nọ, ‘Oware utionana ma be jọ oma Kristẹndọm ruẹ nẹnẹ na.’ Rekọ oware ovo o rrọ Ikereakere na nọ ma rẹ rọ ta nọ Jerusalẹm o dikihẹ kẹ Kristẹndọm ho.