Ababọ avro, Izikiẹl ọ ruẹ emema ilogbo nọ a kare no vẹre, emema iruẹ nọ i wo ibekpe gbe ikpohrokpo nọ i wo uzou ohwo-akpọ nọ e jẹ hae jọ aro ighẹ ivie gbe etẹmpol sa-sa. A jẹ hae jọ ẹkwotọ Asiria gbe Babilonia ruẹ emema itieye na gaga. Ẹsejọhọ, wọhọ epanọ o jẹ hae jọ kẹ amọfa re na, akpọ ọ jẹ hai gbe Izikiẹl unu nọ o te bi rri emema ilogbo nana, enọ ejọ rai i kpehru te enwenọ imita ezeza. Ghele epanọ emema nana e rro te je muozọ te kẹhẹ, e rrọ uzuazọ họ, emema gheghe nọ a rọ itho kare e rrọ.

Wo ohẹriẹ, emama ene nọ Izikiẹl ọ ruẹ evaọ eruẹaruẹ na yọ “emama nọ e rrọ uzuazọ.” Ohẹriẹ na o rro kẹhẹ! Oware nana nọ Izikiẹl ọ ruẹ na u duobọtei te epanọ ọ rọ fodẹ ẹme na “emama nọ e rrọ uzuazọ” isia ikpe evaọ emuhọ eruẹaruẹ riẹ na. (Izik. 1:5-22) Ababọ avro, emama ene nọ e rrọ uzuazọ nọ e be nya rri ofẹ ọvo ẹsiẹvo evaọ otọ agbara-uvie Ọghẹnẹ na u ru Izikiẹl vuhumu nọ Jihova họ ọnọ ọ be kpọ emama kpobi. Eruẹaruẹ evona i re ru omai vuhu oruaro gbe ogaga ulogbo Jihova mu gbe epanọ esuo ehrugbakpọ riẹ o kpehru te.​—1 Irv. 29:11.