Ọnọ ọ ma omai na o wo areghẹ vi omai. Wọhọ Ọsẹ oyoyou, o wo ọdawẹ kẹ omai. Ofariẹ, ọ ma omai re ma su omobọ mai hi. (Jerimaya 10:23) Fikiere, wọhọ epanọ o gwọlọ nọ ọsẹgboni ọ rẹ kpọ ọmọboba na, ere o gwọlọ nọ Ọghẹnẹ ọ rẹ kpọ omai. (Aizaya 48:17, 18) Ehri-izi Ebaibol yọ okẹ nọ u no obọ Ọghẹnẹ ze nọ e rẹ kpọ omai.​—Se 2 Timoti 3:16.

Izi gbe ehri-izi Jihova i re wuhrẹ omai epanọ ma sai ro wo emamọ uzuazọ enẹna, gbe epanọ ma sai ro wo uzuazọ ebẹdẹ bẹdẹ evaọ obaro. Nọ orọnọ Ọghẹnẹ ọ ma omai na, u fo nọ oghẹrẹ nọ ọ be rọ kpọ omai o rẹ da omai ẹro, ma ve koko izi riẹ.​—Se Olezi 19:7, 11; Eviavia 4:11.

Ehri-uzi Ebaibol yọ ẹme uzẹme nọ a rẹ sae rehọ eware sa-sa no ze. Rekọ, uzi o sae jọ rọkẹ ugogo oware jọ. (Iziewariẹ 22:8) O gwọlọ nọ ma re rorote ziezi re ma sai wo otoriẹ oghẹrẹ nọ ehri-uzi Ebaibol jọ u ro kiekpahe ugogo uyero jọ. (Itẹ 2:10-12) Wọhọ oriruo, Ebaibol ọ ta kẹ omai nọ uzuazọ yọ okẹ nọ u no obọ Ọghẹnẹ ze. Uzẹme yena o rẹ sae kpọ omai evaọ iruo mai, nọ ma tẹ rrọ obọ uwou, gbe oke nọ ma te bi kpohọ erẹ. O rẹ lẹliẹ omai ru eware evaọ oghẹrẹ nọ ma rẹ rọ whaha omonwa.​—Se Iruẹru Ikọ 17:28.

Jesu ọ ta ẹme kpahe ehri-izi ivẹ jọ nọ i wuzou gaga. Orọ ọsosuọ o ta kpahe ẹjiroro nọ ma rọ rrọ uzuazọ, koyehọ, re ma riẹ Ọghẹnẹ, you rie, jẹ rọ eva kpobi gọe. O gwọlọ nọ ehri-uzi ọsosuọ nana o rẹ kpọ  omai evaọ iroro-ejẹ mai kpobi. (Itẹ 3:6) Ahwo nọ a bi yeri uzuazọ rai lele ehri-uzi nana a re wo emamọ usu kugbe Ọghẹnẹ, wo uvi evawere, gbe uzuazọ ebẹdẹ bẹdẹ.​—Se Matiu 22:36-38.

Ehri-uzi avọ ivẹ na o rẹ sai fiobọhọ kẹ omai rria dhedhẹ kugbe amọfa. (1 Ahwo Kọrint 13:4-7) Ehri-uzi avọ ivẹ na nọ ma re fihọ iruo u re ru omai yeri kugbe ahwo wọhọ epanọ Ọghẹnẹ o bi yeri kugbe ai.​—Se Matiu 7:12; 22:39, 40.

Ehri-izi Ebaibol i re wuhrẹ iviuwou epanọ a sai ro dhesẹ uyoyou re a jọ okugbe ọvo. (Ahwo Kọlọsi 3:12-14) Ẹme Ọghẹnẹ ọ tẹ jẹ be thọ iviuwou ẹkwoma ehri-uzi ọfa jọ nọ o rẹ kpọ omai nọ o rrọ eva riẹ, oye họ, orọo o rẹ jọ ribri.​—Se Emuhọ 2:24.

Nọ ma te bi lele iwuhrẹ Ebaibol na o rẹ sae thọ omai evaọ ofẹ eware nọ ma bi ro yeri uzuazọ, gbe epanọ ma sai ro wo evawere. Wọhọ oriruo, ega-iruo a rẹ gwọlọ rehọ ahwo nọ a bi yeri uzuazọ rai lele ehri-izi Ebaibol nọ e ta kpahe oruọzewọ gbe obọ nọ a re kru ga evaọ iruo. (Itẹ 10:4, 26; Ahwo Hibru 13:18) Ẹme Ọghẹnẹ o te je bi wuhrẹ omai inọ jọ eware nọ e roja nọ ma wo e da omai ẹro, re ma je rri usu mai kugbe Ọghẹnẹ ghare vi ekwakwa efe.​—Se Matiu 6:24, 25, 33; 1 Timoti 6:8-10.

Nọ ma te bi fi ehri-izi Ebaibol họ iruo o rẹ sai fiobọhọ kẹ omai whaha eware nọ e rẹ wha ẹyao se omai. (Itẹ 14:30; 22:24, 25) Wọhọ oriruo, nọ ma te bi koko uzi Ọghẹnẹ nọ o ta nọ ma da idi thomawa ha, u re fiobọhọ kẹ omai whaha eyao sa-sa gbe omonwa. (Itẹ 23:20) Jihova ọ kuvẹ inọ ma rẹ sae da udi nọ u re mu, rekọ ma rẹ da thomawa ha. (Olezi 104:15; 1 Ahwo Kọrint 6:10) Izi Ọghẹnẹ e rẹ kẹ omai erere keme i bi wuhrẹ omai epanọ ma sae rọ kpọ iroro gbe iruẹru mai. (Olezi 119:97-100) Ghele na, orọnikọ erere nọ o re noi ze ọvo ọ be lẹliẹ uvi Ileleikristi koko izi Ọghẹnẹ hẹ. A bi ru ere re o wha orro se Jihova.​—Se Matiu 5:14-16.