UWUHRẸ 13
Eme Họ Emamọ Usi na Kpahe Egagọ?
1. Kọ egagọ kpobi họ erọ uzẹme?
Ahwo nọ a ginẹ gwọlọ gọ Ọghẹnẹ a rrọ egagọ kpobi. O rrọ emamọ usi inọ Ọghẹnẹ ọ be ruẹ ahwo yena yọ o wo ọdawẹ kẹ ae. Rekọ u yoma gaga inọ ahwo nọ a tubẹ rrọ egagọ a ru eware iyoma buobu no. (2 Ahwo Kọrint 4:3, 4; 11:13-15) Wọhọ epanọ ebe-usi e ta, egagọ jọ i bi wobọ evaọ iruẹru igbulegbu, ahwo-okpe, ẹmo-ofio, gbe emaha nọ a bi gbe-ọfariẹ kugbe. Onana o rẹ kẹ uvi eg’Ọghẹnẹ uye gaga.—Se Matiu 24:3-5, 11, 12.
Egagọ uzẹme ọ rẹ wha orro se Ọghẹnẹ rekọ egagọ erue i re tu ei oma. Egagọ erue i re wuhrẹ eware nọ e rrọ Ebaibol ho, ejọ họ, iwuhrẹ ethọthọ kpahe Ọghẹnẹ gbe ahwo nọ a whu no. Rekọ Jihova ọ gwọlọ nọ ahwo a rẹ riẹ uzẹme na kpahe ọyomariẹ.—Se Izikiẹl 18:4; 1 Timoti 2:3-5.
2. Eme họ emamọ usi na kpahe egagọ?
Egagọ nọ e be ta nọ a you Ọghẹnẹ rekọ akpọ Setan a gine you a rẹ sae viẹ Ọghẹnẹ họ họ. (Jemis 4:4) Ebaibol na o se egagọ erue kpobi “Babilọn Ologbo na.” Babilọn ọ jọ okpẹwho anwae nọ egagọ erue i muhọ no ze nọ Owhe edẹ Noa o ku vrẹ no. Kẹle na, Ọghẹnẹ ọ te raha egagọ erue kpobi no, enọ e be viẹ ahwo họ je bi kienyẹ ahwo.—Se Eviavia 17:1, 2, 5, 16, 17; 18:8.
Emamọ usi efa e riẹ. Ahwo evezi buobu nọ a gbẹ rrọ egagọ erue evaọ akpọ na soso a thọrọ Jihova ẹro ho. O bi koko ahwo otiọye na họ ẹkwoma uzẹme na nọ o bi wuhrẹ ae.—Se Maeka 4:2, 5.
3. Eme u fo nọ ahwo evezi a re ru?
Egagọ uzẹme u bi ku ahwo kugbe
Jihova o wo ọdawẹ kẹ ahwo nọ uzẹme gbe oware ezi o rẹ were. Ọghẹnẹ ọ be tuduhọ ae awọ inọ jọ a no egagọ erue. Ahwo nọ a wo uyoyou kẹ Ọghẹnẹ a rẹ gwọlọ ru inwene re a sai ru ei eva were.—Se Eviavia 18:4.
Evaọ ikpe-udhusoi ọsosuọ, nọ ahwo evezi a yo emamọ usi na mi ikọ na, a dede i rie rehọ avọ oghọghọ. A wuhrẹ edhere uzuazọ okpokpọ mi Jihova, uzuazọ evawere, onọ o kẹ rai ẹruore. Ahwo yena yọ emamọ oriruo nọ ma rẹ rọ aro kele nẹnẹ keme a jẹ usi uwoma na rehọ jẹ rọ oreva Jihova karo evaọ uzuazọ rai.—Se 1 Ahwo Tẹsalonika 1:8, 9; 2:13.
Ahwo nọ a kurẹriẹ no egagọ erue ziọ egagọ uzẹme, Jihova o re dede ae rehọ. Otẹrọnọ whọ jẹ uzizie Jihova rehọ, whọ te jọ ogbẹnyusu riẹ, whọ te jọ omọvo uviuwou enọ e be gọ Jihova nọ e rrọ yoyou, je ti wo uzuazọ ebẹdẹ bẹdẹ.—Se Mak 10:29, 30; 2 Ahwo Kọrint 6:17, 18.
4. Ẹvẹ Ọghẹnẹ ọ te rọ kẹ erẹwho kpobi evawere?
Ẹdhoguo nọ o bi ti te egagọ erue na yọ emamọ usi. Oyena u ti siọ okienyẹ no akpọ na soso. Egagọ erue e gbẹ te viẹ ahwo họ hayo wha omohẹriẹ ze ofa ha. Ahwo kpobi a ve ti kuomagbe gọ Ọghẹnẹ uzẹme ọvuọvo na.—Se Eviavia 18:20, 21; 21:3, 4.
