UWUHRẸ 6
Ẹruore vẹ Ọ Rrọ kẹ Enọ I Whu No?
1. Emamọ usi vẹ o riẹ kpahe enọ i whu no?
Nọ Jesu o te ẹwho Bẹtani nọ ọ kẹle Jerusalẹm, yọ Lazarọs ogbẹnyusu riẹ o whu te edẹ ene no. Jesu avọ Mata gbe Meri, inievo-emetẹ Lazarọs a te kpohọ oria nọ a ki rie fihọ. U kri hi, ahwo buobu a te koko họ etẹe. Dai roro epanọ Mata avọ Meri a ghọghọ te okenọ Jesu ọ kpare Lazarọs ziọ uzuazọ!—Se Jọn 11:21-24, 38-44.
Mata ọ riẹ anwẹdẹ kpahe emamọ usi nọ ọ rrọ kẹ enọ i whu no. Ọ riẹ nọ Ọghẹnẹ ọ te kpare ahwo nọ a whu no zihe ziọ uzuazọ evaọ otọakpọ.—Se Job 14:14, 15.
2. Ẹvẹ ahwo nọ a whu no a rrọ?
Ọghẹnẹ ọ ta kẹ Adamu nọ: “Whẹ yọ ẹkpẹ yọ ẹkpẹ who ti zihe kpohọ.”—EMUHỌ 3:19.
Ẹkpẹ a rọ ma ahwo-akpọ. (Emuhọ 2:7; 3:19) Orọnikọ mai yọ izi nọ i wo ugboma ha. Ugboma iwo ma wo, fikiere oware ovo o rrọ oma mai na nọ o rẹ jọ uzuazọ họ nọ ma te whu no. Nọ ma te whu, ẹvori mai o re gbe ru iruo ho, ma gbẹ sai roro ho. Fikiere, nọ a kpare Lazarọs no uwhu ze, ọ ta ha inọ ọ rọ ẹro ruẹ oware jọ, keme enọ i whu no e riẹ oware ovuovo ho.—Se Olezi 146:4; Ọtausiuwoma Na 9:5, 6, 10.
Kọ Ọghẹnẹ o re fi ahwo họ erae re a jọ etẹe ruẹ uye nọ a te whu no? Nọ ma wuhrẹ no Ebaibol ze inọ ahwo nọ a whu no a riẹ oware ovuovo ho na, uwuhrẹ erae ehẹle yọ uwuhrẹ ọrue nọ a be rọ raha odẹ Ọghẹnẹ. Re a mahe ahwo evaọ erae o rẹ dha Ọghẹnẹ eva.—Se Jerimaya 7:31.
Rri ividio na Ẹvẹ ahwo nọ a whu no a rrọ?
3. Kọ ahwo nọ a whu no a rẹ sae ta ẹme kẹ omai?
Enọ i whu no a rẹ sae ta ẹme he yọ a rẹ sai yo ẹme gbe he. (Olezi 115:17) Rekọ izi imuomu a rẹ sai lele ahwo ta ẹme, a ve ru ahwo roro nọ ae yọ ahwo nọ a whu no. (2 Pita 2:4) Jihova ọ ta nọ o thọ re ohwo ọ gwọlọ lele ahwo nọ a whu no ta ẹme.—Se Iziewariẹ 18:10, 11.
4. Amono a te kpare no uwhu ze?
A te kpare ima ahwo buobu nọ e rrọ uki zihe ziọ uzuazọ evaọ otọakpọ. Makọ otujọ nọ a riẹ Ọghẹnẹ hẹ nọ i ru eware iyoma, a te kpare ae ze.—Se Luk 23:43; Iruẹru Ikọ 24:15.
Ahwo nọ a kpare ze a te sai wuhrẹ uzẹme na kpahe Ọghẹnẹ je fi ẹrọwọ họ Jesu ẹkwoma ẹme nọ a ti yo kẹe. (Eviavia 20:11-13) Enọ a kpare ze nọ i ru eware iwoma a te reawere uzuazọ ebẹdẹ bẹdẹ evaọ otọakpọ na.—Se Jọn 5:28, 29.
5. Eme ẹkparomatha na u wuhrẹ omai kpahe Jihova?
Ọghẹnẹ o ru ẹruore ẹkparomatha na lọhọ ẹkwoma Ọmọ riẹ nọ o vi ze ti whu kẹ omai. Fikiere, ẹkparomatha na o dhesẹ nọ Jihova o wo uyoyou gbe uwowou ulogbo. Evaọ usu ahwo nọ a te kpare ze na, ono whọ mae gwọlọ nọ whọ rẹ ruẹ?—Se Jọn 3:16; Ahwo Rom 6:23.
