U muẹro inọ igogo iwuhrẹ nọ e rrọ Ebaibol na nọ ma ta kpahe no na i ru uyoyou nọ who wo kẹ Jihova ga ziezi. O gwọlọ nọ whọ rẹ gbẹ hai ru uyoyou nana dhe ẹgẹga. (1 Pita 2:2) Re whọ sai wo uzuazọ ebẹdẹ bẹdẹ, who re gbe si kẹle Ọghẹnẹ ẹkwoma Ẹme riẹ nọ who re wuhrẹ.​—Se Jọn 17:3; Jud 21.

Nọ eriariẹ ra kpahe Ọghẹnẹ i bi diwi viere na, ẹrọwọ ra ọ te ga ziezi. Ẹrọwọ o ti fiobọhọ kẹ owhẹ ru Ọghẹnẹ eva were. (Ahwo Hibru 11:1, 6) Ẹrọwọ o ti ru owhẹ kurẹriẹ je ru inwene nọ i ti fiobọhọ kẹ owhẹ evaọ uzuazọ ra.​—Se Iruẹru Ikọ 3:19.

O te were owhẹ re whọ vuẹ amọfa kpahe eware nọ who wuhrẹ no, keme o rẹ were ohwo kpobi re ọ vuẹ amọfa emamọ usi. Nọ whọ be ruabọhọ wuhrẹ Ebaibol na, who ti wuhrẹ epanọ whọ rẹ rọ rehọ Ebaibol na ta kẹ amọfa kpahe ẹrọwọ nọ who wo fihọ Jihova gbe emamọ usi na.​—Se Ahwo Rom 10:13-15.

Ahwo buobu a rẹ kake ta usi uwoma na kẹ egbẹnyusu gbe imoni rai. Rọ areghẹ ru onana. Ukpenọ whọ rẹ ta kẹ ae nọ eware nọ egagọ rai i bi wuhrẹ ai e thọ, u ti woma re whọ ta kẹ ae kpahe eyaa Ọghẹnẹ. Ofariẹ, kareghẹhọ inọ emamọ uruemu ra u re kpomahọ ahwo vi eme nọ whọ ta.​—Se 2 Timoti 2:24, 25.

Nọ who te bi wuhrẹ Ebaibol na, u ti fiobọhọ kẹ owhẹ si kẹle Ọghẹnẹ. Nọ oke o be nyaharo na, who ve ti wo usu okpekpe kugbe Jihova. Whọ rẹ sae jọ omọvo ahwo uviuwou Ọghẹnẹ.​—Se 2 Ahwo Kọrint 6:18.

Whọ sai wo ẹnyaharo evaọ ukoko na ẹkwoma Ẹme Ọghẹnẹ nọ who re gbe wuhrẹ. (Ahwo Hibru 5:13, 14) Ta kẹ omọvo Isẹri Jihova jọ re ọ rehọ obe na, Eme Ebaibol na Ọ rẹ Sai Wuhrẹ Omai? fiobọhọ kẹ owhẹ wuhrẹ Ebaibol. Epanọ who wuhrẹ Ebaibol te, ere uzuazọ ra u ti woma te.​—Se Olezi 1:1-3; 73:27, 28.

Obọ Jihova, Ọghẹnẹ evawere na emamọ usi na u no ze. Whọ rẹ sai si kẹle Ọghẹnẹ ẹkwoma ahwo riẹ nọ who re si kẹle. (Ahwo Hibru 10:24, 25) Nọ whọ tẹ be hae daoma ru Jihova eva were, yọ who bi ru re uvi uzuazọ na u te owhẹ obọ, koyehọ, uzuazọ ebẹdẹ bẹdẹ. Ọghẹnẹ nọ who re si kẹle họ oware nọ o mai woma kpaobọ nọ who re ru.​—Se 1 Timoti 1:11; 6:19.