Jesu o wo ohẹriẹ no ahwo-akpọ kpobi keme ọ rria obọ odhiwu wọhọ ukọ-odhiwu taure a te ti yẹi evaọ otọakpọ. (Jọn 8:23) Ọye họ omama ọsosuọ Ọghẹnẹ, yọ o fiobọhọ kẹ Ọghẹnẹ ma eware efa kpobi. Jesu ọvo Jihova ọ rọ obọ riẹ ma, oyejabọ nọ a ro sei “ọmọzae ọvo” Ọghẹnẹ. (Jọn 1:14) Jesu ọ jọ Ọtota Ọghẹnẹ, fikiere a re je sei “Ẹme na.”​—Se Itẹ 8:22, 23, 30; Ahwo Kọlọsi 1:15, 16.

Ọghẹnẹ o vi Ọmọ riẹ ze otọakpọ ẹkwoma uzuazọ riẹ nọ o kpeze no odhiwu ze fihọ edhede Meri, ọmọtẹ Ju nọ ọ riẹ ọzae he. Fikiere Jesu o wo ọsẹ otọakpọ họ. (Luk 1:30-35) Jesu ọ nyaze otọakpọ (1) re o wuhrẹ omai uzẹme na kpahe Ọghẹnẹ, (2) re o fi oriruo họ otọ kẹ omai evaọ oghẹrẹ nọ ma sai ro ru oreva Ọghẹnẹ makọ evaọ okenọ ebẹbẹ i te te omai, gbe (3) re o siobọno uzuazọ ogbagba riẹ rọ ‘ta’ omai no igbo.​—Se Matiu 20:28.

Ẹme na ẹtanigbo, u dhesẹ ugho nọ a rẹ hwosa re a siobọno ohwo nọ a bruoziẹ uwhu kpe. (Ọnyano 21:29, 30) Owho gbe uwhu e jọ abọjọ ẹjiroro Ọghẹnẹ kẹ ahwo-akpọ no emuhọ ze he. Ẹvẹ ma rọ riẹ? Ọghẹnẹ ọ ta kẹ ohwo ọsosuọ na Adamu, inọ ọ tẹ raha uzi, o ti whu. Fikiere Adamu ọ gbẹ raha uzi hi, ọ hai ti whu hu. (Emuhọ 2:16, 17; 5:5) Wọhọ epanọ Ebaibol ọ ta, fiki Adamu uwhu o rọ “ruọ” akpọ na kpobi. Fikiere, Adamu o te kpeze uzioraha gbe uwhu se emọ riẹ  kpobi. Fikiere ma gwọlọ ẹtanigbo no uwhu nọ ma reuku riẹ no obọ Adamu ze.​—Se Ahwo Rom 5:12; 6:23.

Kọ ono ọ te sae fa omai no igbo uwhu? Ma te whu, izieraha mai ọvo uwhu mai o rẹ sae hwosa rai. Ohwo-akpọ nọ ọ gba ha ọ rẹ sae hwosa izieraha amọfa ha.​—Se Olezi 49:7-9.

Jesu ọ wọhọ omai hi, ọ jọ ohwo ọgbagba. Fikiere Jesu o re whu fiki izieraha riẹ hẹ, keme ọ raha uzi ọvuọvo ho. Ukpoye, fiki izieraha amọfa Jesu o ro whu. Ọghẹnẹ o you omai thesiwa, oye o soriẹ nọ o ro vi Ọmọ riẹ ze ti whu kẹ omai. Jesu o you omai gaga re keme o yo ẹme Ọsẹ riẹ ọ tẹ rọ uzuazọ riẹ hwosa izieraha mai.​—Se Jọn 3:16; Ahwo Rom 5:18, 19.

Rri ividio na Fikieme Jesu o ro whu?

Okenọ Jesu ọ jọ otọakpọ, o siwi enọ e jẹ mọ, ọ kpare enọ i whu, je fiobọhọ kẹ enọ uye o jẹ bẹ. Ọ rọ enẹ dhesẹ eware nọ o ti ru kẹ ahwo-akpọ nọ i yoẹme evaọ obaro. (Matiu 15:30, 31; Jọn 5:28) Nọ Jesu o whu no, Ọghẹnẹ ọ tẹ kpare iẹe kpohọ odhiwu evaọ oma ẹzi. (1 Pita 3:18) Jesu ọ tẹ hẹrẹ evaọ obọze Ọghẹnẹ bẹsenọ Jihova ọ rọ kẹe ogaga nọ o re ro su akpọ na soso. (Ahwo Hibru 10:12, 13) Enẹna Jesu o bi su evaọ obọ odhiwu, yọ ilele riẹ a bi whowho emamọ usi yena evaọ akpọ na soso.​—Se Daniẹl 7:13, 14; Matiu 24:14.

Kẹle na, Jesu nọ ọ rrọ Ovie enẹna, ọ te rehọ ogaga riẹ ku uye-oruẹ kpobi họ jẹ raha ahwo nọ a be wha uye-oruẹ ze. Ahwo kpobi nọ a fi ẹrọwọ họ Jesu bi yoẹme kẹe, a te reawere uzuazọ evaọ aparadase otọakpọ.​—Se Olezi 37:9-11.