UWUHRẸ 8
Fikieme Ọghẹnẹ Ọ rọ Kuvẹ kẹ Emuemu gbe Uye-Oruẹ?
1. Ẹvẹ emuemu o ro muhọ?
Ọghẹnẹ ọ kuvẹ kẹ esuo ahwo-akpọ kri te epanọ u ro dhesẹ nọ a rẹ sai ku ebẹbẹ ahwo-akpọ họ họ
Emuemu o muhọ evaọ otọakpọ okenọ Setan o ro gu ọrue ọsosuọ. Setan ọ jọ ukọ-odhiwu ọgbagba vẹre, rekọ “o dikihẹ ga evaọ uzẹme na ha.” (Jọn 8:44) Egagọ nọ a rẹ rọ kẹ Ọghẹnẹ ọvo i je si ei urru. Setan o gu ọrue kẹ Ivi, aye ọsosuọ na, jẹ tẹzẹ iẹe yoẹme kẹ ọyomariẹ viukpọ Ọghẹnẹ. Adamu o kuomagbe Ivi ghẹmeeyo kẹ Ọghẹnẹ. Oware nana nọ Adamu o ru na o tẹ wha uye-oruẹ gbe uwhu ze.—Se Emuhọ 3:1-6, 19.
Okenọ Setan ọ ta kẹ Ivi nọ ọ ghẹmeeyo kẹ Ọghẹnẹ, Setan ọ rọ ere mu udu-esuo Ọghẹnẹ họ ẹwọso. Ahwo-akpọ buobu a ruọ abọ Setan no be siọ Ọghẹnẹ inọ ọ jọ Osu rai hi. Enẹ Setan o ro zihe ruọ “osu akpọ na.”—Se Jọn 14:30; 1 Jọn 5:19.
2. Kọ oware jọ o thọ Ọghẹnẹ obọ evaọ emama riẹ?
Ọghẹnẹ ọ ma eware kpobi gbagba. Ọghẹnẹ ọ ma ahwo-akpọ gbe ikọ-odhiwu kpobi evaọ oghẹrẹ nọ a sai ro yoẹme kẹe gbagba. (Iziewariẹ 32:4, 5) Ọghẹnẹ ọ ma omai jẹ kẹ omai uvẹ nọ ma rẹ rọ salọ oware nọ ma re ru, te uwoma hayo uyoma. Uvẹ yena nọ ọ kẹ omai na u re ru omai dhesẹ sọ ma you Ọghẹnẹ.—Se Jemis 1:13-15; 1 Jọn 5:3.
3. Fikieme Ọghẹnẹ ọ rọ kuvẹ kẹ uye-oruẹ rite enẹna?
Jihova ọ kuvẹ re a wọso udu-esuo riẹ no anwọ oke ọgbọ Idẹn ze. Fikieme? Re o dhesẹ via nọ esuo ọvuọvo ọ rẹ sae kẹ ahwo erere ababọ riẹ hẹ. (Ọtausiuwoma Na 7:29; 8:9) Eware nọ a rọ ẹro ruẹ no anwọ ikpe idu ezeza (6,000) erọ ikuigbe ohwo-akpọ ze, i ru uzẹme na dhesẹ oma via no. Isu ahwo-akpọ e be sai si ẹmo, ethube, okienyẹ, gbe ẹyao, notọ họ.—Se Jerimaya 10:23; Ahwo Rom 9:17.
Wo ohẹriẹ no esuo ahwo-akpọ, esuo Ọghẹnẹ ọ be kẹ ahwo nọ a jẹ riẹ rehọ erere. (Aizaya 48:17, 18) Kẹle na, Jihova o ti si egọmeti ahwo-akpọ kpobi notọ. Ahwo nọ a gwọlọ nọ Ọghẹnẹ o su ai ọvo a te rria otọakpọ na.—Aizaya 11:9.—Se Daniẹl 2:44.
Rri ividio na Fikieme Ọghẹnẹ ọ rọ kuvẹ kẹ uye-oruẹ rite enẹna?
4. Uvẹ vẹ ma wo fiki odiri Ọghẹnẹ?
Setan ọ ta nọ uvumọ ohwo ọ rrọ họ nọ ọ rẹ gọ Ọghẹnẹ fiki uyoyou nọ o gine wo kẹe. Kọ whọ sai dhesẹ nọ ọrue Setan ọ ta na? Ee! Odiri Ọghẹnẹ o be kẹ omai kpobi uvẹ nọ ma re ro dhesẹ sọ abọ esuo Ọghẹnẹ hayo ọrọ ohwo-akpọ ma rrọ. Ma rẹ rọ oghẹrẹ nọ ma bi yeri uzuazọ mai dhesẹ abọ nọ ma rrọ.—Se Job 1:8-12; Itẹ 27:11.
5. Ẹvẹ ma sai ro dhesẹ nọ ma gwọlọ nọ Ọghẹnẹ o su omai?
Oghẹrẹ nọ ma bi yeri uzuazọ u re dhesẹ sọ ma gwọlọ nọ Ọghẹnẹ ọ jọ Osu mai
Ma re dhesẹ nọ ma gwọlọ nọ Ọghẹnẹ ọ jọ Osu mai nọ ma tẹ be gọe evaọ edhere nọ o rọwo kugbe Ẹme riẹ, Ebaibol na. (Jọn 4:23) Ma rẹ sai dhesẹ nọ ma siọ isuẹsu Setan nọ ma te siomano esuo-ohrowo gbe ẹmo-ofio, wọhọ epanọ Jesu o ru.—Se Jọn 17:14.
Setan ọ be rọ ogaga riẹ lẹliẹ ahwo roro nọ ọfariẹ-ogbe avọ iruemu iyoma efa i woma. Nọ ma te siomano iruemu itieye, egbẹnyusu gbe imoni mai jọ a rẹ sae poviẹ hayo wọso omai. (1 Pita 4:3, 4) Fikiere, ma rẹ salọ abọ nọ ma rẹ jọ. Kọ ma ti kuomagbe ahwo nọ a you Ọghẹnẹ? Kọ ma ti koko izi riẹ, enọ i dhesẹ areghẹ gbe uyoyou riẹ via na? Ma te ru ere, yọ ma bi dhesẹ nọ ọrue Setan ọ ta evaọ okenọ ọ ta nọ ohwo ọvo o ti yoẹme kẹ Ọghẹnẹ hẹ nọ ọ tẹ rẹriẹ ovao ku ebẹbẹ.—Se 1 Ahwo Kọrint 6:9, 10; 15:33.
Uyoyou nọ Ọghẹnẹ o wo kẹ ahwo-akpọ o kẹ imuẹro inọ emuemu gbe uye-oruẹ u ti kuhọ. Ahwo nọ a wo ẹrọwọ a te reawere uzuazọ evaọ otọakpọ bẹdẹ bẹdẹ.—Se Jọn 3:16.
