Ọghẹnẹ o bi zizie ahwo erẹwho kpobi re a si kẹle iẹe ẹkwoma olẹ. (Olezi 65:2) Rekọ orọnọ elẹ kpobi ọ rẹ gaviezọ kẹ hayo jẹrehọ họ. Wọhọ oriruo, elẹ ọzae nọ ọ rẹ lahiẹ aye riẹ e rẹ sai brudhe. (1 Pita 3:7) Ofariẹ, okenọ ahwo Izrẹl a jẹ rọwo kurẹriẹ no umuomu hu, Ọghẹnẹ ọ gbẹ jẹ gaviezọ kẹ elẹ rai hi. O rrọ vevẹ inọ olẹ yọ uvẹ-ọghọ nọ u fo nọ ma re rri vo ho. Ghele na, Ọghẹnẹ ọ rẹ gaviezọ kẹ elẹ ahwo nọ a thọ izi ilogbo otẹrọnọ a kurẹriẹ.​—Se Aizaya 1:15; 55:7.

Rri ividio na Kọ elẹ kpobi Ọghẹnẹ ọ rẹ gaviezọ kẹ?

Olẹ yọ abọjọ egagọ mai, fikiere, Jihova, Ọnọ ọ ma omai na ọvo u fo nọ ma rẹ lẹ se. (Matiu 4:10; 6:9) U te no ere no, nọ ma gba ha na, u fo nọ ma rẹ lẹ evaọ odẹ Jesu keme ọye họ ọnọ o whu fiki izieraha mai. (Jọn 14:6) Jihova ọ gwọlọ nọ ma hae wariẹ elẹ nọ ma se fihọ uzou hayo nọ ma kere fihọ obe he. Ọ gwọlọ nọ ma lẹ no udu mai ze.​—Se Matiu 6:7; Ahwo Filipai 4:6, 7.

Ọghẹnẹ ọ rẹ sai yo elẹ nọ ma jọ udu lẹ dede. (1 Samuẹle 1:12, 13) O zizie omai nọ ma lẹ evaọ oke kpobi, wọhọ oriruo, nọ ma tẹ rọwo ze gbe okenọ ma bi kiẹzẹ, evaọ oke emuọriọ gbe okenọ ma rẹriẹ ovao ku ebẹbẹ.​—Se Olezi 55:22; Matiu 15:36.

O lọhọ tere he re ma si kẹle Ọghẹnẹ keme ma be rria udevie ahwo nọ a kare ẹrọwọ jẹ be rehọ eyaa nọ Ọghẹnẹ ọ yaa inọ udhedhẹ o te jọ akpọ na ro se ẹkoko. (2 Timoti 3: 1, 4; 2 Pita 3:3, 13) Fikiere, o gwọlọ nọ ma rẹ hai kuomagbe ibe Ileleikristi mai re ma sae bọ ohwohwo ga.​—Se Ahwo Hibru 10:24, 25.

Nọ ma tẹ be hai kuomagbe ahwo nọ a you Ọghẹnẹ, u re fiobọhọ kẹ omai si kẹle Ọghẹnẹ. Iwuhrẹ Isẹri Jihova yọ oria nọ whọ sae jọ wo uduotahawọ nọ who te bi muẹrohọ ẹrọwọ amọfa.​—Se Ahwo Rom 1:11, 12.

Whọ rẹ sai si kẹle Jihova nọ whọ tẹ be hai roro didi kpahe eware nọ who wuhrẹ no Ebaibol na ze. Hai roro kpahe iruẹru, ehrẹ, gbe eyaa riẹ. Ma tẹ be hae lẹ je roro didi, u re ru omai vuhu epanọ uyoyou Ọghẹnẹ gbe areghẹ riẹ u woma te.​—Se Joshua 1:8; Olezi 1:1-3.

Re whọ sai si kẹle Ọghẹnẹ, o gwọlọ nọ who re fievahọ iẹe je fi ẹrọwọ họ iẹe. Rekọ ẹrọwọ ọ wọhọ okakọ nọ o gwọlọ ẹruorote. O gwọlọ nọ whọ rẹ hai roro didi kpahe eware nọ e lẹliẹ owhẹ wo ẹrọwọ re whọ rọ ere bọ ẹrọwọ ra ga.​—Se Matiu 4:4; Ahwo Hibru 11:1, 6.

Jihova ọ rẹ rẹrote ahwo nọ a you rie. Ọ rẹ sae thọ ae no oware kpobi nọ o rẹ sai fi ẹrọwọ gbe ẹruore uzuazọ ebẹdẹ bẹdẹ rai họ ọza. (Olezi 91:1, 2, 7-10) Ọ rẹ vẹvẹ omai unu kpahe iruemu nọ e rẹ sae wha ẹyao se omai je mi omai evawere. Jihova o bi wuhrẹ omai edhere uzuazọ nọ o mai woma kpaobọ.​—Se Olezi 73:27, 28; Jemis 4:4, 8.