Ọghẹnẹ o koko uyẹ Abraham họ, o te ru ai họ orẹwho, jẹ kẹ orẹwho na izi nọ a re koko. O se orẹwho na “Izrẹl,” je ru re orẹwho na o wha egagọ uzẹme gbe ẹme riẹ haro. (Olezi 147:19, 20) Fikiere ahwo erẹwho kpobi a rẹ sai wo erere no orẹwho Izrẹl ze.​—Se Emuhọ 22:18.

Ọghẹnẹ ọ salọ ahwo Izrẹl re a jọ isẹri riẹ. Iku anwae ahwo Izrẹl na i dhesẹ irere nọ i re te ahwo nọ a te bi koko izi Ọghẹnẹ. (Iziewariẹ 4:6) Fikiere, amọfa a rẹ sae riẹ Ọghẹnẹ uzẹme na ẹkwoma ahwo Izrẹl na.​—Se Aizaya 43:10, 12.

Nọ u te oke jọ, ahwo Izrẹl a gbe wo aruoriwo Ọghẹnẹ hẹ, Jihova ọ tẹ rehọ ukoko Ileleikristi na nwene ẹta orẹwho yena. (Matiu 21:43; 23:37, 38) Nẹnẹ, uvi Ileleikristi họ enọ i bi se isẹri kẹ Jihova orọnikọ ahwo Izrẹl he.​—Se Iruẹru Ikọ 15:14, 17.

Jesu ọ ruẹrẹ ilele riẹ họ re a ta usi uwoma na je ru ahwo zihe ruọ ilele evaọ udevie ahwo erẹwho kpobi. (Matiu 10:7, 11; 24:14; 28:19, 20) Iruo nana i bi te ekuhọ no enẹna, keme edẹ urere uyero-akpọ na ma rrọ na. Evaọ oke mai na, Jihova o ru oware nọ o ri ru ẹdẹvo ho, o koko ima ahwo buobu họ rono erẹwho kpobi ze bi kuomagbe evaọ egagọ uzẹme. (Eviavia 7:9, 10) Uvi Ileleikristi a bi kuomagbe re a tuduhọ ohwohwo awọ je fiobọhọ kẹ ohwohwo. Evaọ akpọ na soso, eware evona uvi Ileleikristi a bi wuhrẹ no Ebaibol ze evaọ oria iwuhrẹ rai.​—Se Ahwo Hibru 10:24, 25.

Ukoko Isẹri Jihova orọ oke mai na u muhọ evaọ etoke ikpe 1870. Evaọ oke yena umutho emọ-iwuhrẹ Ebaibol jọ a  te mu uzẹme na họ ẹkiẹvia. A tẹ te riẹ nọ Jesu ọ ruẹrẹ ukoko Ileleikristi na họ re a ta usi uwoma, fikiere a te muọ usi uwoma na họ ewhowho evaọ erẹwho sa-sa. Evaọ ukpe 1931, a tẹ rehọ odẹ na, Isẹri Jihova.​—Se Iruẹru Ikọ 1:8; 2:1, 4; 5:42.

Evaọ ikpe-udhusoi ọsosuọ, utu ẹruorote na nọ u vuhumu inọ Jesu họ Ọnọ o wuzou ukoko na oye o jẹ rẹrote ikoko nọ e jọ ewho sa-sa evaọ oke yena. (Iruẹru Ikọ 16:4, 5) Epọvo na nẹnẹ re, ekpako nọ i wo eriariẹ ziezi, enọ i ru Utu Ẹruorote na via, e be rẹrote Isẹri Jihova evaọ akpọ na soso. Utu Ẹruorote na o be rẹrote iwou ogha erọ Isẹri Jihova nọ a be jọ fa, printi, jẹ ghale ebe nọ a bi ro wuhrẹ ahwo Ebaibol na evaọ evẹrẹ nọ i bu vi egba ihrẹ (700). Enẹ Utu Ẹruorote na o be rọ kẹ ikoko nọ i bu vi idu udhusoi (100,000) evaọ akpọ na soso uduotahawọ je bi ru ai riẹ oware nọ a re ru wọhọ epanọ Ikereakere na e ta. Evaọ ikoko Isẹri Jihova kpobi, a rehọ ezae nọ e nyate itee Ikereakere na mu ekpako ukoko, hayo esẹro. Ezae nana e be rọ edhere oyoyou sẹro idibo Ọghẹnẹ.​—Se 1 Pita 5:2, 3.

A ruẹrẹ Isẹri Jihova họ re a ta usi uwoma na je ru ilele. Ma be ta usi uwoma no uwou ruọ uwou wọhọ epanọ ikọ Jesu a je ru. (Iruẹru Ikọ 20:20) Ma re je wuhrẹ Ebaibol kugbe ohwo kpobi nọ ọ ginẹ gwọlọ riẹ uzẹme na. Rekọ, orọnọ Isẹri Jihova yọ ukoko jọ gheghe he. Mai yọ ahwo uviuwou ovo nọ u wo Ọsẹ oyoyou. Mai kpobi yọ inievo-emezae gbe erọ emetẹ nọ i wo ọdawẹ kẹ ohwohwo. (2 Ahwo Tẹsalonika 1:3) Nọ orọnọ a ruẹrẹ ahwo Jihova họ re a ru ei eva were je fiobọhọ kẹ amọfa na, ae họ uviuwou nọ o be mai wo evawere evaọ otọakpọ na.​—Se Olezi 33:12; Iruẹru Ikọ 20:35.