UWUHRẸ 10
Ẹvẹ Whọ Sai ro Vuhu Egagọ Uzẹme?
1. Kọ egagọ uzẹme ọvuọvo ọ riẹ?
“Wha yọroma kẹ eruẹaro erue.”—MATIU 7:15.
Egagọ ọvuọvo Jesu o wuhrẹ ilele riẹ kpahe, oyehọ egagọ uzẹme. O wọhọ edhere nọ o bi su kpohọ uzuazọ ebẹdẹ bẹdẹ. Jesu ọ ta nọ: “Umutho ahwo a bi duku” edhere yena. (Matiu 7:14) Egagọ nọ i bi lele uzẹme nọ o rrọ Ebaibol na ọvo Ọghẹnẹ ọ rẹ jẹrehọ. Eware evona ahwo kpobi nọ a rrọ egagọ uzẹme na a rọwo.—Se Jọn 4:23, 24; 14:6; Ahwo Ẹfisọs 4:4, 5.
Rri ividio na Kọ Egagọ Kpobi E rẹ Were Ọghẹnẹ?
2. Eme Jesu ọ ta kpahe Ileleikristi erue?
“A rẹ jọ ẹgbede ta nọ a riẹ Ọghẹnẹ, rekọ a be rọ iruo rai rọ se iẹe.”—TAITỌS 1:16.
Jesu ọ vẹvẹ unu inọ ikọ erue i ti gbe egagọ Ileleikristi ku. Evaọ okafe, a wọhọ uvi Ileleikristi. Te ai te enọ e rrọ ichọche rai a re se omarai Ileleikristi. Rekọ whọ rẹ sae rehọ oghẹrẹ ahwo nọ a ginẹ rrọ ro vuhu ae. Evaọ oghẹrẹ vẹ? Egagọ uzẹme ọvo whọ sae jọ ruẹ ahwo nọ a be rọ uruemu gbe idhere rai dhesẹ nọ ae yọ uvi Ileleikristi.—Se Matiu 7:13-23.
3. Ẹvẹ whọ sai ro vuhu ahwo nọ a rrọ egagọ uzẹme?
Joma ta kpahe eware isoi jọ nọ a sai ro vuhu ai:
-
Enọ e rrọ egagọ uzẹme a re wo adhẹẹ kẹ Ẹme Ọghẹnẹ, Ebaibol na. A rẹ daoma ru lele ehri-izi Ebaibol na. Fikiere, egagọ uzẹme u wo ohẹriẹ no egagọ nọ i bi lele iroro ahwo-akpọ. (Matiu 15:7-9) Ahwo nọ a rrọ egagọ uzẹme a re ru lele eware nọ a be ta kẹ amọfa.—Se Jọn 17:17; 2 Timoti 3:16, 17.
-
Uvi Ileleikristi a rẹ rọ adhẹẹ kẹ odẹ Ọghẹnẹ, Jihova. Jesu ọ rọ adhẹẹ kẹ odẹ Ọghẹnẹ ẹkwoma odẹ na nọ ọ jẹ hae ta ẹme kpahe kẹ amọfa. O fiobọhọ kẹ ahwo riẹ Ọghẹnẹ je wuhrẹ ai re a lẹ inọ odẹ Ọghẹnẹ o jọ fuafo. (Matiu 6:9) Evaọ oria nọ whọ be rria, egagọ vẹ o bi wuhrẹ amọfa odẹ Ọghẹnẹ?—Se Jọn 17:26; Ahwo Rom 10:13, 14.
-
Uvi Ileleikristi a rẹ ta usi uwoma kpahe Uvie Ọghẹnẹ. Ọghẹnẹ o vi Jesu ze re ọ ta usi uwoma kpahe Uvie na. Uvie Ọghẹnẹ họ ẹruore ọvuọvo nọ ahwo-akpọ a wo. Jesu ọ gbẹ jẹ ta ẹme kpahe Uvie na rite ẹdẹ nọ o ro whu. (Luk 4:43; 8:1; 23:42, 43) Ọ ta nọ ilele riẹ a te ta usi uwoma kpahe Uvie Ọghẹnẹ. Otẹrọnọ ohwo jọ ọ nyabru owhẹ ze te ta kpahe Uvie Ọghẹnẹ, egagọ vẹ who re roro nọ ohwo na ọ rrọ?—Se Matiu 24:14.
-
Ilele Jesu a wo obọ kugbe akpọ omuomu nana ha. Whọ rẹ sai vuhu ai keme a re wobọ evaọ isuẹsu hayo ohọre ẹwho ho. (Jọn 17:16; 18:36) Ofariẹ, a rẹ raro kele ikpehre eware avọ iruemu iyoma akpọ na ha.—Se Jemis 4:4.
-
Uvi Ileleikristi a re wo uyoyou udidi kẹ ohwohwo. A jọ Ẹme Ọghẹnẹ wuhrẹ inọ a re wo adhẹẹ kẹ ahwo erẹwho kpobi. Dede nọ ẹsibuobu egagọ erue a rẹ tha erẹwho nọ i bi fi ẹmo uke, ahwo nọ a rrọ egagọ uzẹme a re wobọ evaọ ẹmo ho. (Maeka 4:1-3) Ukpoye, uvi Ileleikristi a rẹ rọ oke, igho gbe ekwakwa rai fiobọhọ kẹ amọfa jẹ kẹ ae uduotahawọ.—Se Jọn 13:34, 35; 1 Jọn 4:20.
4. Kọ whọ sai vuhu egagọ uzẹme na?
Egagọ vẹ ọ be rehọ iwuhrẹ rai kpobi no Ebaibol na ze, be rọ adhẹẹ kẹ odẹ Ọghẹnẹ, je bi whowho nọ Uvie Ọghẹnẹ họ ẹruore ọvuọvo nọ ọ rrọ kẹ ahwo-akpọ? Utu ahwo vẹ a bi dhesẹ uyoyou, yọ a re dhomahọ ẹmo-ofio ho? Amono who roro?—Se 1 Jọn 3:10-12.
