Rri oware nọ o be via na: Oke kpobi nọ Julia o te rri ughẹgbe, epanọ o fu te ọvo ọ rẹ ruẹ. Ọ vẹ ta kẹ omariẹ nọ, “Mẹ gwọlọ kpọ.” Dede nọ ọsẹgboni riẹ gbe egbẹnyusu riẹ a be ta kẹe nọ omariẹ u yoma ha, ọ rẹ rọwo ho.

Kẹle na, Julia o bi ru eware nọ e rẹ lẹliẹe kpọ. Ọ be siọ emu ba ẹre evaọ edẹ jọ . . .

Otẹrọnọ oware nọ o be via kẹ Julia na whẹ o be via kẹ, eme who ti ru?

Orọnọ o thọ họ re whọ ruawa kpahe oghẹrẹ nọ omara o rrọ. A tubẹ jọ Ebaibol na dede fodẹ ezae gbe eyae jọ nọ i wo erru gaga wọhọ Sera, Reshẹl, Abigẹle, Josẹf, gbe Devidi. Ebaibol na ọ fodẹ aye jọ nọ a re se Abishag nọ “o wo eru gaga.”​—1 Ivie 1:4.

Rekọ, izoge buobu a rẹ ruawa vrẹta kpahe oghẹrẹ nọ omarai o rrọ. Oyena o rẹ wha ebẹbẹ ze. Roro kpahe onana:

• Evaọ ekiakiẹ jọ nọ a ru, emetẹ 58 evaọ usu emetẹ udhusoi (100) a bi roro nọ a fu gahrọ, rekọ uzẹme riẹ họ, 17 ọvo evaọ usu rai a ginẹ rrọ ere.

• Evaọ ekiakiẹ efa jọ nọ a ru, eyae 45 evaọ usu eyae udhusoi (100) nọ omarai u woma ziezi, a bi roro nọ a fu gahrọ!

• Fikinọ a gwọlọ kpọ, izoge jọ a kie ruọ ẹyao nọ a re se anorexia​—koyehọ ekpehre ẹyao nọ ohwo o re wo fikinọ ọ be rọwo re emu d’oma ha.

 Who te wo ẹyao nana nọ a re se anorexia na hayo otẹrọnọ whọ be ruẹ emu dhẹ, ta re a fiobọhọ kẹ owhẹ. Ta kẹ ọsẹgboni ra hayo omọfa jọ nọ ọ kpako vi owhẹ nọ who fievahọ. Ebaibol na ọ ta nọ: “Ogbẹnyusu ọ rọ rọkẹ eyowo ẹsikpobi, rekọ oniọvo ọ rẹ ruẹ uye oniọvo.”​—Itẹ 17:17.

Uzẹme riẹ họ, oghẹrẹ ohwo nọ whọ rrọ evaọ obeva oye o rẹ whẹ erru họ owhẹ hayo si erru no owhẹ. Roro kpahe oriruo Absalọm ọmọzae Devidi ovie na. Ebaibol na ọ ta nọ:

“Ohwo ọvuọvo o wo eru te Absalom ho; no evawọ ri te uzou riẹ eka e jariẹ hẹ.”​—2 Samuẹle 14:25.

Ghele na, omorro, isiuru kẹ ọkwa, gbe uruemu ovivie ọvo e da riẹ oma fia! Ebaibol na ọ ta emamọ ẹme ọvuọvo kpahe Absalọm vievie he; Ebaibol na o dhesẹ i rie wọhọ ohwo nọ ọ rẹ wha omovuọ se uviuwou, gbe ojihẹ.

Fiki onana, Ebaibol na ọ tẹ kẹ omai emamọ ohrẹ nana:

“Wha “whẹ uruemu okpokpọ na họ oma.”​—Ahwo Kọlọsi 3:10.

“Wha jọ osẹ rai o jọ orọ okafe he . . . , rekọ jọ o jọ orọ obọ udu na”​—1 Pita 3:3, 4.

Dede nọ u yoma re ohwo ọ whẹ erru họ oma ha, oware nọ o mai wuzou vi erru oma họ, uruemu ra. Evaọ uzuazọ, emamọ iruemu nọ who wo, e rẹ lẹliẹ owhẹ si amọfa urru vi erru ugboma gheghe! Ọmọtẹ jọ nọ a re se Phylicia ọ ta nọ, “Erru ra ahwo a rẹ kake ruẹ, rekọ oghẹrẹ ohwo nọ whọ rrọ evaọ obeva, gbe emamọ iruemu ra eye ahwo a te mae rọ kareghẹhọ owhẹ.”

Kọ o rẹ kẹ owhẹ uye ẹsikpobi nọ who te roro kpahe oghẹrẹ nọ omara o rrọ?

Kọ whọ be hae gwọlọ ru oghẹrẹ obẹrọ jọ re oria jọ omara nọ who roro nọ u woma tere he o sae ruẹrẹ họ, manikọ whọ be hae siọ emu ba ẹre re whọ sae kawo oma?

Eme whọ hae gwọlọ nwene evaọ omara otẹrọnọ whọ rẹ sai ru ei? (salọ onọ whọ gwọlọ na.)

• UTHETHEI HAYO OKPẸKPẸE

• UFUẸFU HAYO OKAKAO

• ETO

• UGBOMA

• OVAO

• OVIOMA

Otẹrọnọ whọ ta nọ, Ee rọkẹ enọ ivẹ ọsosuọ na, jẹ salọ esa hayo bu viere evaọ eware nọ ma kele na, roro kpahe onana: Ẹsejọhọ amọfa a bi rri owhẹ wọhọ epanọ whọ be nwani rri omara na ha. O lọhọ gaga re whọ ruawa vrẹta kpahe oghẹrẹ nọ omara o rrọ.​—1 Samuẹle 16:7.