Rri oware nọ o be via na: U ri te iminiti ikpe he nọ Karen ọ rọ rrọ epati na, o te yo uvou ohwo jọ nọ ọ riẹ nọ o se odẹ riẹ.

Karen o te kuoma rẹriẹ jẹ ruẹ ogbẹnyusu riẹ Jessica nọ o kru egọ idi ivẹ họ obọ. Ọ riẹ nọ idi nọ i re mu e rrọ Jessica obọ na. Jessica ọ tẹ rehọ ọgọ udi ovo kẹ Karen jẹ ta kẹe nọ, “Mi whọ da, ọmaha whọ gbẹ rrọ họ.”

Karen ọ gwọlọ se, rekọ Jessica yọ ogbẹnyusu riẹ. Yọ Karen ọ gwọlọ nọ ogbẹnyusu riẹ o rri rie wọhọ ohwo nọ o rovie aro ho ho. U te je no ere no, Jessica yọ emamọ ọmọtẹ. Nọ orọnọ ọ be da na, kiyọ o nwani yoma ha. Karen ọ tẹ ta kẹ omariẹ nọ, ‘udi gheghe, orọnọ imu egaga ha.’

Otẹrọnọ whẹ họ Karen, eme whọ hai ti ru?

Re whọ sae jẹ emamọ iroro evaọ uyero utiona, o gwọlọ nọ whọ rẹ riẹ oghẹrẹ ohwo nọ whọ rrọ. Koyehọ evaọ obeva, whọ rẹ riẹ ọnyaba ra, je dikihẹ kẹ oware nọ whọ rọwo. Nọ whọ tẹ riẹ ere no, whọ te gbẹ kuvẹ re amọfa a vuẹ owhẹ oghẹrẹ nọ who re yeri uzuazọ ra ha.​—1 Ahwo Kọrint 9:26, 27.

Ẹvẹ whọ sai ro wo oghẹrẹ udu utioye? Whọ tẹ sae kẹ iyo enọ 4 nọ e rrọ obaro na, u ti fiobọhọ kẹ owhẹ.

Nọ whọ tẹ riẹ emamọ iruemu jọ nọ who wo gbe eware jọ nọ whọ riẹ eru ziezi, o rẹ lẹliẹ owhẹ bru ọghọ họ omara.

IRIRUO AHWO JỌ EVAỌ EBAIBOL NA: Pọl ukọ na o kere inọ: “O tẹ make rọnọ mẹ riẹ ẹme ẹta ha, me wo eriariẹ.” (2 Ahwo Kọrint 11:6) Fikinọ Pọl o wo otoriẹ Ikereakere na ziezi, ọ sai dikihẹ ga nọ amọfa a jẹ ta eme iyoma kpahe iẹe. Ọ kuvẹ re ekpehre eme nọ a ta, i whrehe iei udu hu.​—2 Ahwo Kọrint 10:10; 11:5.

KIẸ OMARA RIWI: Kere eware jọ nọ whọ riẹ eru fihọ otọ hayo onaa jọ nọ who wo.

Dhesẹ emamọ uruemu jọ nọ who wo. (Wọhọ oriruo, kọ who wo ọdawẹ? Who re ru ọghọ? Kọ a rẹ sai fievahọ owhẹ? Kọ who re koko oke?)

Wọhọ epanọ ohwo nọ ọ da idi thomawa o re nwene nọ eme riẹ e gbẹ gba ha na, ere ọvona oghẹrẹ ohwo nọ whọ rrọ o re nwene nọ whọ tẹ be kuvẹ re elọhoma ra e kpọ uzuazọ ra.

IRIRUO AHWO JỌ EVAỌ EBAIBOL NA: Pọl ọ riẹ oghẹrẹ elọhoma nọ o wo. O kere nọ: “Evaọ udu mẹ, o rrọ isiuru mẹ re me koko uzi Ọghẹnẹ, rekọ mẹ be jọ oma mẹ ruẹ uzi ofa jọ nọ o be họre so uzi iroro mẹ, u te bi ru omẹ jọ igbo kẹ uzi uzioraha.”​—Ahwo Rom 7:22, 23.

KIẸ OMARA RIWI: Oghẹrẹ elọhoma vẹ who wo nọ o gwọlọ nọ who re ru inwene fihọ?

Kọ whọ rẹ ruọ omoto, whọ vẹ ta kẹ edraeva na nọ ọ dhẹ oria jọ wariẹ họ ọvo bẹsenọ epẹtiro riẹ i re re? Oware nọ u ghẹ tei o rrọ họ, o tẹ jẹ rrọ oke oraha kufiẹ gheghe!

Eme onana u bi wuhrẹ omai? Who te fi itee họ kẹ omara, uzuazọ ra o gbẹ jọ gedegede he. Whọ vẹ riẹ obonọ whọ be nya gbe epanọ who re ro te obei.

IRIRUO AHWO JỌ EVAỌ EBAIBOL NA: Pọl o kere nọ: “Oghẹrẹ nọ mẹ be dhẹ o rrọ ugbẹdhẹ hẹ.” (1 Ahwo Kọrint 9:26) Ukpenọ Pọl o re yeri uzuazọ riẹ fariẹfariẹ, o fi itee họ kẹ omariẹ jẹ daoma le itee na t’obọ.​—Ahwo Filipai 3:12-14.

KIẸ OMARA RIWI: Kere itee esa jọ nọ who wo fihọ otọ, enọ whọ hae gwọlọ le t’obọ evaọ ukpe notha na.

Eware nọ whọ rọwo i gbe mu owhẹ ẹro ho, whọ rẹ jọ gedegede. Wọhọ epanọ ewhewhẹ o re nwene ekọlọ na, ere who ti nwene, re whọ sai ru eva were ehwa ra, onọ u re dhesẹ nọ who wo ẹme-obọ họ.

Wo ohẹriẹ, who te bi ru lele eware nọ whọ rọwo, oghẹrẹ ohwo nọ whọ rrọ ọ gbẹ thọrọ owhẹ ẹro ho, makọ eware nọ amọfa a ru kẹhẹ

IRIRUO AHWO JỌ EVAỌ EBAIBOL NA: O sae jọnọ okenọ Daniẹl ọruẹaro na ọ gbẹ jọ uzoge ọ rọ jọ udu riẹ “ma” inọ o re koko izi Ọghẹnẹ, dede nọ a mu rie siọ uviuwou riẹ ba. (Daniẹl 1:8) Fikinọ ọ jọ udu riẹ gbaemu no, u fiobọhọ kẹe yọroma. Daniẹl o yeri uzuazọ lele eware nọ ọ rọwo.

KIẸ OMARA RIWI: Eware vẹ i gine mu owhẹ ẹro? Wọhọ oriruo: Kọ whọ rọwo nọ Ọghẹnẹ ọ rrọ? O tẹ rrọ ere, fikieme? Eware vẹ e kẹ owhẹ imuẹro nọ Ọghẹnẹ ọ ginẹ rrọ?

Kọ u gine mu owhẹ ẹro nọ izi Ọghẹnẹ e rrọ rọkẹ ewoma ra? O tẹ rrọ ere, fikieme?

Evaọ ukuhọ riẹ, oghẹrẹ ohwo vẹ whọ ginẹ gwọlọ jọ, kọ whọ gwọlọ jọ wọhọ obe ure nọ ofou ọ rẹ wọ kpenẹ avọ enẹ manikọ wọhọ ure nọ o rẹ za okpofou dhe? Oghẹrẹ ohwo nọ whọ rrọ ọ gbẹ thọrọ owhẹ ẹro ho, whọ te jọ wọhọ ure utioye na. Onana u ti fiobọhọ kẹ owhẹ kuyo onọ na, Oghẹrẹ Ohwo vẹ Mẹ Rrọ?