Rri oware nọ o be via na: Anwọ emerae ivẹ ọvo Heather avọ Mike a be rọ nyusu na, rekọ o rrọ Heather oma wọhọ ẹsenọ ọ riẹ Mike kri no. Aimava a re vi uwou se ohwohwo jẹ ta ẹme krẹkri evaọ ifonu, yọ ohwo jọ ọ tẹ be ta ẹme, ọnọ o kiọkọ ọ rẹ tubẹ riẹ ẹme nọ ọ be te ta ze! Rekọ orọnọ ẹmeọta-kugbe ọvo Mike ọ gwọlọ họ.

Evaọ emerae ivẹ nọ e vrẹ na, oware nọ Mike avọ Heather a be hai ru ọvo họ, omobọ nọ a be hai kru jẹ dina viọlọ umunu. Heather ọ gwọlọ nọ o rẹ vrẹ ere he. Yọ ọ gwọlọ nọ usu riẹ avọ Mike o fa gbe he. Mike o re ku edẹ họ iẹe jẹ nabi tete iei ziezi. Heather ọ rẹ ta kẹ omariẹ nọ, ‘Mẹ avọ Mike ma you ohwohwo ziezi . . .’

Otẹrọnọ who te ohwo nọ ọ rẹ nyusu orọo no, eme who re ru otẹrọnọ oware nọ o be via kẹ Heather na whẹ o be via kẹ?

Whọ tẹ la no ehru ure ze be gwọlọ rra wọhọ ọmọvra, whọ riẹ oware nọ o rẹ via kẹ owhẹ. Epọvo na o rẹ via kẹ ohwo nọ ọ la uzi Ọghẹnẹ vrẹ, wọhọ onọ o ta nọ: “Siomano ọfariẹ-ogbe.”​—1 Ahwo Tẹsalonika 4:3.

Didi enwoma i re noi ze nọ ohwo ọ tẹ la uzi nana vrẹ? Ebaibol na ọ ta nọ: “Ohwo kpobi nọ o bi gbe-ọfariẹ ọ be raha uzi wọso oma obọriẹ.” (1 Ahwo Kọrint 6:18) Ẹvẹ ẹme nana ọ rọ rrọ uzẹme?

 Ahwo nọ a re ru ekiakiẹ gaga a ta nọ izoge nọ i gbe-ọfariẹ no a rẹ rẹriẹ ovao dhe ovo jọ evaọ usu eware nọ ma be te fodẹ na.

• ỌKORA. Izoge buobu nọ i lele ọmọzae hayo ọmọtẹ wezẹ no a ta nọ a vioja riẹ uwhremu na.

• ABABỌ EVAIFIHỌ. Nọ ọmọzae avọ ọmọtẹ a tẹ wezẹ kugbe no, aimava na a re viẹro ku ohwohwo, a ve muhọ eroro inọ, ‘Kọ mẹ ọvo ọmọzae nana hayo ọmọtẹ nana o lele wezẹ no?’

• ABABỌ ADHẸẸ. Emetẹ buobu a rẹ gwọlọ ọmọzae nọ ọ rẹ kẹ ae adhẹẹ orọnọ ọnọ ọ rẹ gwọlọ edhere kpobi nọ o re ro lele ai wezẹ hẹ. Yọ rọkẹ emezae buobu, ọmọtẹ nọ a lele wezẹ no ọ rẹ gbẹ were ai hi.

• Uzẹme ẹme na họ: Who te lele ọmọzae hayo ọmọtẹ wezẹ no, yọ who ru omara nọ o rrọ ghaghae fihọ kuẹku no. (Ahwo Rom 1:24) Omara o ghare vi oware nọ whọ rẹ rọ zaharo!

Who te “siomano ọfariẹ-ogbe” yọ who bi dhesẹ nọ who wo udu nọ whọ sae rọ dadamu kẹ oware nọ u kiehọ. (1 Ahwo Tẹsalonika 4:3) Kẹsena nọ whọ tẹ rọo evaọ odẹnotha, whọ sai lele ọzae hayo aye ra wezẹ. Yọ whọ te ginẹ reawere riẹ wọhọ epanọ whọ gwọlọ ababọ awaruọ, oja nọ whọ rẹ viẹ, gbe ebẹbẹ efa nọ i re noi ze.​—Itẹ 7:22, 23; 1 Ahwo Kọrint 7:3.

• Kọ who roro nọ ohwo nọ o gine you owhẹ o re ru oware nọ o rẹ da owhẹ jẹ wha enwoma se owhẹ?

• Kọ who roro nọ ohwo nọ o gine you owhẹ ọ te ta nọ wha ru oware nọ o rẹ raha usu ra kugbe Jihova?​—Ahwo Hibru 13:4.