ABỌ AVỌ 9
Whẹ avọ Uviuwou Ra Wha Gọ Jihova
“Wha gọ Ọnọ ọ ma odhiwu na gbe otọakpọ na.”—Eviavia 14:7
Wọhọ epanọ whọ jọ ibroshọ nana wuhrẹ no na, ithubro buobu e rrọ Ebaibol na nọ i re fiobọhọ kẹ owhẹ avọ uviuwou ra. Jihova ọ gwọlọ nọ who wo evawere. Ọ ya eyaa nọ whọ tẹ rọ egagọ riẹ karo, o “ti fi eware efa nana kpobi ba” kẹ owhẹ. (Matiu 6:33) Ọ gwọlọ nọ whọ jọ ogbẹnyusu riẹ. Rọ uvẹ kpobi nọ u rovie fihọ bọ usu ra kugbe Ọghẹnẹ ga. A rẹ ruẹ oware nọ u woma tei hi re a jọ ogbẹnyusu Jihova.—Matiu 22:37, 38.
1 BỌ USU RA KUGBE JIHOVA GA ZIEZI
OWARE NỌ EBAIBOL NA Ọ TA: “‘Mẹ vẹ te jọ ọsẹ rai, wha vẹ te jọ emezae gbe emetẹ mẹ,’ ere Jihova Erumeru na ọ ta.” (2 Ahwo Kọrint 6:18) Ọghẹnẹ ọ gwọlọ nọ whọ jọ ogbẹnyusu ọkpekpe riẹ. Olẹ yọ edhere jọ nọ whọ sae rọ jọ ogbẹnyusu Ọghẹnẹ. Jihova o zizie owhẹ nọ whọ “hae lẹ kẹse kẹse.” (1 Ahwo Tẹsalonika 5:17) Ọ gwọlọ nọ whọ ta oware kpobi nọ o rrọ owhẹ oja gbe onọ o be kẹ owhẹ uye kẹe. (Ahwo Filipai 4:6) Nọ whẹ avọ uviuwou ra wha tẹ be hae lẹ kugbe, a te ruẹ nọ whọ ginẹ rẹroso Ọghẹnẹ.
U te no olẹ nọ whọ rẹ lẹ no, o gwọlọ nọ whọ rẹ jẹ gaviezọ kẹ Ọghẹnẹ. Whọ sae gaviezọ kẹe ẹkwoma Ebaibol na gbe ebe nọ a kere no Ebaibol ze nọ who re se. (Olezi 1:1, 2) Roro didi kpahe eware nọ who se. (Olezi 77:11, 12) Re whọ gaviezọ kẹ Ọghẹnẹ o gwọlọ nọ who re je kpohọ iwuhrẹ ukoko Ileleikristi ẹsikpobi.—Olezi 122:1-4.
Amọfa nọ whọ rẹ ta kẹ kpahe Jihova yọ obọdẹ edhere ọfa nọ whọ rẹ rọ bọ usu ra kugbei ga ziezi. Epanọ whọ ta kpahe Jihova te ere usu ra kugbei o te ga te re.—Matiu 28:19, 20.
OWARE NỌ WHỌ RẸ SAI RU:
-
Fi oke họ nọ who re ro se Ebaibol na jẹ lẹ kẹdẹ kẹdẹ
-
Whẹ avọ uviuwou ra wha rọ egagọ Ọghẹnẹ karo viukpọ eware omaweromẹ hayo erọ aruọzaha
2 WO ERERE NO EGAGỌ UVIUWOU RA ZE
OWARE NỌ EBAIBOL NA Ọ TA: “Wha si kẹle Ọghẹnẹ, o re ti si kẹle owhai.” (Jemis 4:8) Wha fi oke họ nọ wha re ro ru egagọ uviuwou rai, jẹ ruẹ nọ u re vo owhai hi. (Emuhọ 18:19) U te no ere no, o gbẹ gwọlọ oware ofa mi owhẹ. Wha rẹ rọ ẹme Ọghẹnẹ kuọ omarai kẹdẹ kẹdẹ. Whẹ avọ uviuwou ra wha bọ usu rai kugbe Ọghẹnẹ ga ẹkwoma ẹme riẹ nọ wha rẹ ta okenọ “wha keria eva iwou rai, no wha be nya eva edhere, gbe okenọ wha kiẹzẹ, gbe okenọ wha rọo ze.” (Iziewariẹ 6:6, 7) Gbaemu nọ whọ rẹ rọ aro kele Joshua nọ ọ ta nọ: “Rọ kẹ omẹ avọ uwou mẹ ỌNOWO na ma rẹ gọ.”—Joshua 24:15.
OWARE NỌ WHỌ RẸ SAI RU:
-
Wha hai wuhrẹ ẹme Ọghẹnẹ kugbe kẹse kẹse, je ru ei evaọ edhere nọ ohwo kpobi evaọ uviuwou na o re ro wo erere noi ze
