WHỌ kọrọ apo jọ nọ ọ rrọ wowoma no ogha- ure riẹ ze. Who te se ore awere riẹ je fi ei họ eva ekete nọ whọ kọrọ ejọ kuku no. Whọ rrọ iruo anwọ ẹsiẹ, rekọ whọ gwọlọ gbe ru keme oma o re rrọ owhẹ hẹ. Oni ra ọ rrọ kugbe ahwo uviuwou ra nọ i kiọkọ gbe inievo efa, be kọrọ evaọ ure nọ o kẹle etẹe, yọ aikpobi a bi gbiku avọ evawere. Oni ra ọ wariẹ zihe ruọ uvovo-aye no, nwane wọhọ epanọ ọ jọ evaọ okenọ whọ gbẹ jọ ọmaha. U bi gbe owhẹ unu nọ, kọ oni mẹ nọ ọ jọ ọkpọkuaye oke ẹdẹ evaọ akpọ nọ ọ vrẹ na ọna? Ẹyao ọ jẹ sai jei kpare obọ hayo owọ họ, yọ iraro ra na o ro se ẹwẹ họ. Oviẹ nọ whọ viẹ okenọ a je ki ei, a rẹ ruẹ unu gbiku riẹ hẹ. Rekọ obọnana a kpare riẹ avọ ahwo buobu zihe ziọ uzuazọ no, avọ omokpokpọ.

Ma riẹ nọ oke utiona o be tha, a rẹ vro avro riẹ hẹ. U mu omai ẹro keme eyaa Ọghẹnẹ kpobi e rẹ seba erugba ha. Evaọ abọ nana, ma te ta kpahe epanọ eyaa Uvie na jọ i ti ro rugba kẹle, onọ u ti su kpohọ ẹmo Amagẹdọn. Ma te jẹ ta kpahe eyaa Uvie na efa nọ i ti rugba nọ Amagẹdọn o te fi vrẹ no. Eva e te ginẹ were omai gaga nọ Uvie Ọghẹnẹ u te mu otọakpọ na soso họ esu no, nọ u ti ru eware kpobi fihọ ekpokpọ.