Ibe Owhowho-Uvie Ọghaghae Mai:

DAE rehọ iẹe nọ whẹ yọ omọvo uviuwou Ebẹtẹle obọ Brooklyn evaọ ohiohiẹ Edisoi-Oka, edẹ 2 Akpe, 1914. Whọ keria agbara ra evaọ uwou emuọriọ na be hẹrẹ re Brọda C. T. Russell ọ nyaze. Ẹsiẹvo na Brọda Russell o te rovie ẹthẹ rueva. Ọ tẹ dina dikihẹ wọhọ epanọ o re ru anwẹdẹ, o te yere inievo uviuwou Ebẹtẹle na avọ ovao ohwohwẹ inọ “Wha do, inievo.” Taure ọ tẹ te keria, ọ tẹ tehe abọ, kẹsena o te ru owhowhovia obọdẹ jọ, inọ: “Oke Egedhọ u te oba no; ivie rai i su edẹ rai gba no.” Eva e tẹ were owhẹ thesiwa keme u kri no nọ whọ be rọ hẹrẹ ẹdẹ nana. Whai ahwo uviuwou Ebẹtẹle na soso wha tẹ tehe abọ avọ oghọghọ oke krẹkri.

 Ikpe buobu e ruemu no anwọ oke nọ Brọda Russell o ro whowho usi evawere yena. Kọ eme Uvie na u ru no anwọ oke yena ze? U ru eware buobu no. Jihova ọ be rọ ẹkwoma Uvie na ru idibo riẹ fo je wuhrẹ ai. Umutho idu jọ ọvo a bu te evaọ ukpe 1914, rekọ enẹna a bu vi ima ihrẹ gbe idu egba isoi (7,500,000) no. Idhere sa-sa vẹ who ro wo erere no uwuhrẹ nana ze no?

Nẹnẹ, inievo mai a rẹ ta ẹsikpobi nọ, “akẹkẹ Jihova ọ be dhẹ ọvo,” yọ ere o ginẹ rrọ. Rekọ uzẹme riẹ họ, anwọ ukpe 1914 ze, akẹkẹ na nọ o dikihẹ kẹ abọ ukoko Jihova nọ o rrọ obọ odhiwu na, ọ be dhẹ vẹrẹ gaga wọhọ epanọ obe nana u ti dhesẹ via na. Iwhowho-uvie a rehọ idhere sa-sa te ahwo oma no re a sae ta usiuwoma na evaọ akpọ na soso, idhere na jọ họ ebe-usi, usiuwoma nọ a rẹ jọ dhuhie họ evaọ iyẹrẹ, ifoto, ekade usiuwoma ota, egramafonu, irediyo, gbe Itanẹte.

Avọ obufihọ Jihova, ma bi kere ebe nọ e rrọ wowoma evaọ evẹrẹ nọ i bu vi egba ezeza gbe udhosa gbe ikpe (670) jẹ be rehọ ae kẹ ahwo ababọ unuigho nọ ma re se kẹ ae. Inievo buobu a be fialoma via kẹ ebabọ Egwa Uvie, Egwa Okokohọ, gbe iwou ogha evaọ ekwotọ nọ ahwo a jọ wo igho, gbe enọ a jọ wo ho. U te no ere no, nọ eware okpẹtu e tẹ via, inievo iyoyou mai a rẹ dhogbo bru ahwo nọ eware na e via kẹ, onọ u gine dhesẹ nọ “oniọvo ọ rẹ ruẹ uye oniọvo.”—Itẹ 17:17.

Ẹsejọ, isu egagọ na gbe ewegrẹ efa a rẹ rehọ odẹ “izi gba ẹguae ọraha,” rekọ ẹrọwọ mai ọ be ga ziezi nọ ma be ruẹ nọ kẹse kẹse omodawọ rai na u bi fiobọhọ evaọ “ẹnyaharo usi uwoma na.”—Ol. 94:20; Fil. 1:12.

Ibe iruiruo mai, o rrọ oware evawere gaga nọ ma bi ro ru iruo Uvie na kugbe. Ma you owhai gaga. Ma lẹ nọ eware nọ e rrọ obe nana i fiobọhọ kẹ owhẹ rri ukuoriọ ra evaọ egagọ Ọghẹnẹ ghaghae vi epaọ anwẹdẹ.—Mat. 24:45.

Ma be lẹ nọ eware i woma kẹ owhai,

Inievo rai,

Utu Ẹruorote Iruẹru Isẹri Jihova