UWUHRẸ AVỌ 58
A Raha Jerusalẹm
Ahwo Juda a tẹ wariẹ nyasiọ Jihova ba nyae gọ emedhọ. Evaọ ikpe buobu, Jihova ọ jẹ daoma fiobọhọ kẹ ai. O vi eruẹaro riẹ buobu nyae vẹvẹ ai unu rekọ a yo ghele he. Ukpoye, a tẹ jẹ rọ eruẹaro na zaharo. Ẹvẹ Jihova o ro si egagọ erue no otọ na riẹriẹriẹ?
Ovie Babilọn nọ a re se Nebukadneza o je fi erẹwho buobu kparobọ unọjọ utọjọ. Oke ọsosuọ nọ o ro fi Jerusalẹm kparobọ, o te mu Jehoyakin ovie na, emọ-ivie, egbaẹmo, gbe ahwo buobu nọ a wo onaa iruo sa-sa kpohọ igbo evaọ obọ Babilọn. Yọ ọ wọ eware eghaghae buobu nọ e jọ etẹmpol Jihova rehọ re. Nebukadneza ọ tẹ rehọ Zẹdikaya mu ovie Juda.
Evaọ oke ọsosuọ, Zẹdikaya o je yoẹme kẹ Nebukadneza. Rekọ erẹwho nọ e kẹle rai gbe eruẹaro erue na a tẹ tuduhọ iẹe awọ nọ o gbe yoẹme kẹ ovie Babilọn ho. Jerimaya ọ tẹ vẹvẹ Zẹdikaya unu inọ: ‘Who gbe yoẹme kẹe he, ahwo buobu a ti whu, ohọo o te jọ otọ na, yọ ahwo a te mọ eyao sa-sa evaọ Juda.’
Nọ Zẹdikaya o su te ikpe ihrẹ no, o gbe je yoẹme kẹ ovie Babilọn ho. Ọ tẹ nyae ta kẹ egbaẹmo Ijipti re a nyaze ti fiobọhọ kẹe. Rekọ Nebukadneza o te vi egbaẹmo riẹ nyae họre Jerusalẹm, fikiere egbaẹmo riẹ a tẹ wariẹ okpẹwho na soso họ. Jerimaya ọ tẹ ta kẹ Zẹdikaya nọ: ‘Jihova ọ ta nọ ọ te thọ owhẹ avọ okpẹwho na soso otẹrọnọ whọ romakpotọ kẹ ovie Babilọn. Rekọ whọ gbẹ romakpotọ kẹe he, ahwo Babilọn a te raha Jerusalẹm muotọ, a ve mu owhai kpohọ igbo.’ Zẹdikaya ọ tẹ ta nọ: ‘Mẹ rẹ dawo oware utioye vievie he!’
Evaọ ukpe ovo gbe emerae ezeza nọ i lele i rie, egbaẹmo Babilọn a te kporo igbẹhẹ Jerusalẹm fihọ otọ, je tu erae họ okpẹwho na soso. A mahe etẹmpol na, a kpe ahwo buobu, a te je mu ahwo buobu kpohọ igbo.
Zẹdikaya ọ tẹ jẹ dhẹ, rekọ ahwo Babilọn a tẹ rọ tuae. A te lei mu evaọ ẹwho jọ nọ ọ kẹle Jeriko, a te mu ei se Nebukadneza. Nebukadneza ọ tẹ jọ iraro Zẹdikaya kpe emezae riẹ. Kẹsena Nebukadneza o te tuaro Zẹdikaya je fi iei họ uwou-odi, yọ etẹe o whu fihọ. Rekọ Jihova ọ ya eyaa kẹ ahwo Juda inọ: ‘Nọ ikpe 70 e tẹ vrẹ no, me ti zihe owhai ziọ Jerusalẹm.’
Kọ eme ọ te via kẹ emaha nọ a mu kpohọ igbo evaọ obọ Babilọn na? Kọ a ti yoẹme kẹ Jihova evaọ obei?
“Jihova Ọghẹnẹ, Erumeru na, oziẹobro ra o rrọ gbagba je kiẹrẹe.”—Eviavia 16:7
Enana E Sae jẹ Were Owhẹ
EBAIBOL NA—OVUẸ VẸ O RIẸ EVA?
Ivie Iwoma gbe Iyoma
EBAIBOL NA—OVUẸ VẸ O RIẸ EVA?
