Evaọ ẹdẹjọ, Nebukadneza ọ tẹ wezẹ ewezẹ jọ nọ i mu rie ozọ gaga. O te se ezae iwareghẹ riẹ kpobi kokohọ re a fa otọ ewezẹ na kẹe. Rekọ ohwo ọvo ọ sae fa otọ ewezẹ na kẹe he. Kẹsena ovie na ọ tẹ nọ Daniẹl sọ ọ sae fa otọ ewezẹ na.

Nebukadneza ọ tẹ ta kẹ Daniẹl nọ: ‘Nọ mẹ jọ ewezẹ, mẹ tẹ ruẹ ure ulogbo jọ. Ure na u theri gaga. A rẹ jọ oria kpobi ruẹ e riẹ evaọ akpọ na soso. Ebe riẹ i re wowoma, yọ o mọ ibi buobu. Erao e rẹ jọ otọ edhedhẹ riẹ, yọ emevra e bọ iwou fihọ egha riẹ. Kẹsena enjẹle jọ o te no obọ odhiwu ze, o te bo nọ: ‘Kie ure na fihọ otọ re who ko egha riẹ no. Jọ iroro riẹ i no erọ ohwo no, re o wo iroro arao, re isiahrẹ e vrẹ. Ahwo kpobi nọ a rrọ uzuazọ a vẹ te riẹ nọ Ọghẹnẹ nọ ọ mai kpehru kpobi na ọye o bi su uvie ahwo, ọye ọ rẹ rehọ iẹe kẹ ohwo nọ o je rie.’

Jihova o dhesẹ otọ ewezẹ na kẹ Daniẹl. Nọ Daniẹl o wo otoriẹ ewezẹ na no, ozọ u te mu ei gaga. Ọ tẹ ta kẹ ovie na nọ: ‘O ovie, dodokọ ewegrẹ ra ewezẹ nana i kie kpahe, rekọ whẹ i kie kpahe. Whẹ họ ure ulogbo nọ a ko fihọ otọ na. A ti mi owhẹ uvie ra na, whọ vẹ te re ẹbe evaọ obọ ẹwọ wọhọ arao ẹwọ. Rekọ fikinọ enjẹle na ọ ta nọ a nyasiọ ehri ure na ba, whọ te wariẹ zihe ziọ uvie ra na.’

Nọ ukpe ovo o vrẹ no, ẹdẹjọ Nebukadneza ọ tẹ jẹ nya ehru uwou riẹ wariẹ, yọ o bi rri epanọ Babilọn o wo erru te. Ọ tẹ ta avọ omorro nọ: ‘Rri epanọ okpẹwho nana nọ mẹ bọ na o wo erru te. Rri epanọ me kpehru te!’ Epanọ ọ be rọ ta ẹme na, urru jọ u te no obọ odhiwu ze ta nọ: ‘Nebukadneza! A mi owhẹ uvie ra no.’

Ẹsiẹvo na, iroro Nebukadneza i te zihe ruọ erọ arao ẹwọ. A te lei no uvie riẹ, ọ tẹ jẹ rria kugbe erao evaọ obọ ẹwọ. Eto Nebukadneza e jọ thethei wọhọ ibekpe ugo, yọ ikpituabọ riẹ e wọhọ erọ ọmọvra.

 Nọ ikpe ihrẹ e vrẹ no, iroro Nebukadneza i te zihe ze, Jihova ọ tẹ wariẹ rehọ iẹe mu ovie Babilọn. Nebukadneza ọ tẹ ta nọ: ‘Me re jiri Jihova, ovie idhiwu na. Enẹna mẹ riẹ no nọ Jihova họ Osu nọ ọ mai kpehru. O re hrẹ ahwo nọ a wo omorro kpotọ, yọ ọ rẹ rehọ isuẹsu kẹ ohwo nọ u je rie.’