Evaọ aso ẹdẹjọ, Nebukadneza ovie na ọ tẹ wezẹ ewezẹ jọ nọ i gbe rie unu gaga. Ewezẹ na e kẹ riẹ uye te epanọ ọ gbẹ jẹ sae rọ wezẹ hẹ. O te se ahwo emajiki riẹ kpobi kokohọ, ọ tẹ ta kẹ ai nọ: ‘Wha fa otọ ewezẹ mẹ na kẹ omẹ.’ A tẹ ta kẹe nọ: ‘O ovie, ivie ta ewezẹ na kẹ omai.’ Rekọ Nebukadneza ọ tẹ ta kẹ ai nọ: ‘Ijo! Wha rẹ ta ewezẹ na jẹ fa otọ riẹ kẹ omẹ, o gbẹ rrọ ere he, me ti kpe owhai kpobi no.’ A tẹ wariẹ ta kẹe nọ: ‘Ta ewezẹ na kẹ omai, re ma fa otọ riẹ kẹ owhẹ.’ Nebukadneza ọ tẹ ta kẹ ai nọ: ‘Whai kpobi wha gwọlọ fi omẹ iwhayo. Wha ta ewezẹ na kẹ omẹ!’ A tẹ ta kẹ ovie na nọ: ‘Ohwo ọvo nọ ọ rẹ sai ru oware utioye ọ rrọ họ. Ma rẹ sai ru oware nọ whọ be ta na ha.’

Eva e tẹ dha Nebukadneza te epanọ ọ rọ ta nọ a nyai kpe ezae iwareghẹ na kpobi no. Whaọ Daniẹl, Shedrak, Mishak, gbe Abẹdnigo a rrọ usu ezae iwareghẹ nọ a gwọlọ kpe no na. Daniẹl ọ tẹ vuẹ ovie na inọ ọ kẹ ai omoke jọ. Kẹsena ọyomariẹ avọ egbẹnyusu riẹ a tẹ lẹ se Jihova nọ o fiobọhọ ke ai. Kọ eme Jihova o ru?

Jihova ọ tẹ rehọ eruẹaruẹ dhesẹ ewezẹ Nebukadneza na kẹ Daniẹl, ọ tẹ jẹ fa otọ rai rọ kẹe. Evaọ ẹdẹ nọ o lele i rie, Daniẹl ọ tẹ nyabru odibo ovie na jẹ ta kẹe nọ: ‘Who kpe ezae iwareghẹ na vievie he. Mẹ rẹ sae fa otọ ewezẹ ovie na.’ Odibo ovie na ọ tẹ rehọ Daniẹl se Nebukadneza. Daniẹl ọ tẹ ta kẹ ovie na nọ: ‘Oware nọ o te via evaọ obaro Ọghẹnẹ o dhesẹ kẹ owhẹ. Ewezẹ ra na ena: Nọ whọ jọ owezẹ, whọ tẹ ruẹ ẹmema ologbo jọ nọ a rehọ igoru ru uzou riẹ, a rehọ isiliva ru igbama gbe abọ riẹ, a rehọ ẹroo ru eva gbe ikpekpawọ riẹ, a tẹ rehọ ayọno ru awọ riẹ, rekọ iziawọ riẹ, abọjọ ọviẹẹ abọjọ ayọno. Kẹsena utho jọ u te bru no obọ ugbehru ze, o tẹ tehe awọ ẹmema na. O tẹ whọlọ ẹmema na ehehẹhẹ, kẹsena  ofou o te fou ehẹhẹ riẹ vrẹ. Utho na u te zihe ruọ ugbehru ulogbo nọ o vọ otọakpọ na soso.’

Daniẹl ọ tẹ ta nọ: ‘Otọ ewezẹ ra na ona: Uzou igoru ẹmema na họ uvie ra. Igbama gbe abọ nọ a rehọ isiliva ru na, o dikihẹ kẹ uvie nọ o te rehọ ẹta ra. Uvie ofa jọ o te jọ nọ o wọhọ ẹroo, onọ u ti su akpọ na soso. Uvie nọ u ti lele oyena, o te jọ gaga wọhọ ayọno. Yọ uvie nọ u ti lele oyena, o te hẹriẹ kpohọ abava, abọjọ ọ te jọ gaga wọhọ ayọno, abọ nọ o kiọkọ ọ vẹ te jọ wọhọ ọviẹẹ. Utho nọ u zihe ruọ ugbehru na họ Uvie Ọghẹnẹ. Uvie Ọghẹnẹ o te whọlọ ivie nana kpobi no, o vẹ te jọ bẹdẹ bẹdẹ.’

Nebukadneza o te kie fihọ aro Daniẹl jẹ vovao tuotọ. Ọ tẹ ta kẹ Daniẹl nọ: ‘Ọghẹnẹ ra họ ọnọ o dhesẹ otọ ewezẹ na kẹ owhẹ. Ọghẹnẹ nọ ọ wọhọ e riẹ ọ rrọ họ.’ Ukpenọ Nebukadneza o kpe Daniẹl, ọ tẹ rehọ iẹe mu ọnọ o wuzou ezae iwareghẹ nọ e rrọ uvie Babilọn soso. Kọ whọ gbẹ ruẹ oghẹrẹ nọ Jihova ọ rọ kuyo olẹ Daniẹl?