Ọmọ Zekaraya avọ Ẹlizabẹt nọ a re se Jọn o zihe ruọ ọruẹaro nọ ọ kpako no. Jihova ọ rehọ ẹkwoma Jọn jẹ ta kẹ ahwo nọ Mesaya na ọ be tha. Jọn o je wuhrẹ ahwo evaọ obọ udhude, ukpenọ o re wuhrẹ ahwo evaọ iwou-egagọ hayo evaọ ẹwho. Ahwo a je no obọ Jerusalẹm gbe ewho Juda ze re a gaviezọ kẹ Jọn. O je wuhrẹ ai inọ re a sai ru Ọghẹnẹ eva were, a re siobọno eware iyoma. Ahwo buobu nọ a gaviezọ kẹ Jọn a kurẹriẹ, Jọn ọ tẹ họ ai ame evaọ ethẹ Jọdan.

Jọn o je yeri uzuazọ okpohwo ho. Ewu nọ a rọ eto ekamẹle ru Jọn o jẹ hai kuhọ, yọ ebaka-ẹkpẹ avọ ọnyọ ọ jẹ hae re. Ahwo a gwọlọ riẹ oghẹrẹ ohwo nọ Jọn ọ rrọ. Makọ ahwo Farisi avọ ahwo Sadusi nọ a wo omorro gaga na a nyabru Jọn ze. Jọn ọ ta kẹ ae nọ: ‘Wha siobọno eware iyoma nọ wha bi ru re wha kurẹriẹ. Wha roro nọ wha kiẹrẹe he fikinọ wha be ta nọ whai yọ emọ Abraham. Yọ onana u dhesẹ gbe he inọ whai yọ emọ Ọghẹnẹ.’

Ahwo buobu a tẹ nyabru Jọn ze jẹ nọ inọ: ‘Eme ma re ru re ma sai ru Ọghẹnẹ eva were?’ Jọn ọ tẹ ta kẹ ahwo na nọ: ‘Jọ ohwo nọ o wo iwu ivẹ ọ rehọ ọjọ kẹ ohwo nọ o wo ho.’ Kọ whọ riẹ oware nọ ọ rọ ta ere? Ọ gwọlọ nọ ilele riẹ a riẹ nọ re a ru Ọghẹnẹ eva were, a re you amọfa.

Jọn ọ ta kẹ enọ i re mi azọhọ nọ: ‘Wha jọ ahwo oruọzewọ, wha fi ohwo ọvo iwhayo ho.’ Ọ ta kẹ isoja nọ: ‘Wha re udi hi, yọ wha gu ọrue gbe he.’

 Izerẹ na gbe ahwo Livai na a nyaze te ruẹ Jọn jẹ nọe inọ: ‘Whẹ yọ ono? Ahwo na kpobi a gwọlọ riẹ oghẹrẹ ohwo nọ whọ rrọ.’ Jọn ọ tẹ ta nọ: ‘Mẹ yọ uvou ohwo nọ o bi se evaọ udhude, bi su ahwo bru Jihova, nwane wọhọ epanọ Aizaya ọ ta.’

Eware nọ Jọn o je wuhrẹ ahwo e jẹ were ai gaga. Ahwo buobu a je roro sọ Jọn họ Mesaya na. Rekọ ọ jẹ ta kẹ ai nọ: ‘Ọnọ ọ rro vi omẹ ọ be tha. Me te ohwo nọ ọ rẹ ra ifi eviẹ riẹ hẹ. Ame mẹ be rọ họ owhai ame, rekọ ọ te rehọ ẹzi ọfuafo họ owhai ame.’