O vrẹ ikpe egba ene (400) soso no anwẹnọ a rọ wariẹ bọ igbẹhẹ Jerusalẹm na. Ozerẹ jọ nọ a re se Zekaraya avọ aye riẹ Ẹlizabẹt, a jẹ rria kẹle Jerusalẹm. U kri no nọ a rọ rọo rekọ a re sai yẹ ọmọ ọvuọvo ho. Whaọ evaọ ẹdẹjọ, epanọ Zekaraya ọ be rọ mahe insẹnse evaọ etẹmpol na, enjẹle jọ nọ a re se Gebriẹl ọ tẹ romavia kẹe. Ozọ u te mu Zekaraya gaga, rekọ Gebriẹl ọ tẹ ta kẹe nọ: ‘Ozọ u mu owhẹ hẹ. Mẹ wha emamọ usi no obọ Jihova se owhẹ. Ẹlizabẹt aye ra o ti dihọ o ve ti yẹ ọmọzae, wha ve se odẹ riẹ Jọn. Jihova ọ salọ Jọn no rọkẹ obọdẹ iruo jọ.’ Zekaraya ọ tẹ nọ Gebriẹl nọ: ‘Kọ ẹvẹ mẹ sae rọ rọwo ẹme ra na? Mẹ avọ aye mẹ ma kpako vi ọmọ oyẹ no.’ Gebriẹl ọ tẹ ta kẹe nọ: ‘Ọghẹnẹ o vi omẹ uwou nana se owhẹ. Rekọ fikinọ whọ rọwo ẹme mẹ hẹ na, who ti dienu bẹsenọ a re yẹ ọmọ na no.’

Zekaraya ọ tẹ rria obọ etẹmpol kri vi epanọ ọ rẹ rria kri te vẹre. Nọ o ti no evaọ Etẹmpol na ze, ahwo nọ a jẹ hẹrẹ iẹe evaọ obọ otafe, a tẹ gwọlọ riẹ oware nọ o soriẹ ze nọ o ro kri tere. Rekọ Zekaraya ọ gbẹ be sae ta ẹme he, enu riẹ o di no. Obọ ọ jẹ rọ ta ẹme kẹ ahwo. Ahwo na a tẹ te riẹ nọ Ọghẹnẹ ọ vuẹ Zekaraya uwou jọ.

Nọ oke jọ o vrẹ no, Ẹlizabẹt o te dihọ je yẹ ọmọzae nwane wọhọ epanọ enjẹle na ọ ta. Egbẹnyusu gbe imoni riẹ a tẹ nyaze te ruẹ ọmọ na. Eva e were rai gaga kẹ Ẹlizabẹt. Ẹlizabẹt ọ tẹ ta nọ: ‘Jọn ma ti se ọmọ na.’ Egbẹnyusu riẹ gbe imoni riẹ a tẹ ta nọ: ‘A mu Jọn kẹ ohwo ọvo evaọ uviuwou ra ha. Rehọ odẹ ọsẹ riẹ Zekaraya ro sei.’ Rekọ Zekaraya o te kere eme nana fihọ obe kẹ ai inọ: ‘Jọn họ odẹ ọmọ na.’ Ẹsiẹvo na, Zekaraya o te mu ẹme họ ẹta! Usi ọmọ na u te do ruọ ẹkwotọ Juda soso, akpọ o te gbe ahwo unu, a tẹ jẹ ta nọ: ‘Didi oghẹrẹ ohwo ọmọ nana ọ be te jọ?’

 Ẹzi Ọghẹnẹ ọ tẹ ruọ Zekaraya oma. Ọ tẹ ruẹaro nọ: ‘Joma jiri Jihova, keme ọ ya eyaa kẹ Abraham nọ o ti vi osiwi ze, Mesaya na, ọnọ o ti siwi omai. Jọn ọ te jọ ọruẹaro, yọ ọye ọ te ruẹrẹ edhere na họ kẹ Mesaya na.’

Omamọ oware jọ o via kẹ Meri nọ ọ rrọ omoni Ẹlizabẹt. Ma te ta kpahe onana evaọ uzoẹme nọ o rrọ aro na.