Jesu o wo egbẹnyusu ekpekpe esa jọ evaọ ẹwho jọ nọ a re se Bẹtani. Ae họ Lazarọs, gbe inievo emetẹ riẹ, Meri avọ Mata. Ẹdẹjọ nọ Jesu ọ jọ abọdekọ Jọdan, Meri avọ Mata a te vi uwou se Jesu kpata kpata inọ: ‘Lazarọs ọ be mọ gaga, ivie nyaze vẹrẹ!’ Rekọ Jesu ọ rọ oke yena nya ha. Ọ hẹrẹ te edẹ ivẹ re ọ tẹ te vuẹ ilele riẹ nọ: ‘Ma kpobọ Bẹtani. Lazarọs ọ rrọ owezẹ, yọ mẹ be nya re mẹ rọwo iẹe.’ Ikọ na a tẹ ta nọ: ‘Otẹrọnọ Lazarọs ọ rrọ owezẹ, oma riẹ o te ga.’ Jesu ọ tẹ ta kẹ ai nọ: ‘Lazarọs o whu no.’

Nọ Jesu o te Bẹtani yọ Lazarọs o whu te edẹ ene no, yọ a ki rie no. Ahwo buobu a nyabru Mata avọ Meri ze te sasa ae oma. Nọ Mata o yo nọ Jesu ọ be nyaze, ọ tẹ dhẹ bru ei. Mata ọ tẹ ta kẹ Jesu nọ: “Olori, whọ hae jọ etenẹ, oniọvo mẹ ọ hai whu hu.” Jesu ọ tẹ ta kẹe nọ: ‘Oniọvo ra ọ te wariẹ zihe ziọ uzuazọ. Kọ whọ rọwo onana Mata?’ Mata ọ tẹ ta nọ: ‘Mẹ riẹ nọ ọ te kparoma ze evaọ oke ẹkparomatha na.’ Jesu ọ tẹ vuẹe nọ: “Mẹ họ ẹkparomatha gbe uzuazọ.”

Mata ọ tẹ nyae vuẹ Meri nọ: ‘Jesu ọ nyaze no.’ Meri ọ tẹ dhẹ bru Jesu, ogbotu na a te lele iei. Meri o te kigwẹ fihọ aro Jesu je kuenu oviẹ. Ọ tẹ ta kẹe nọ: ‘Olori, whọ hae jọ etenẹ, oniọvo mẹ ọ hai ti whu hu!’ Nọ Jesu ọ ruẹ Meri nọ ọ be viẹ, o te muhọ ẹviẹ re. Nọ ogbotu na a ruẹ Jesu nọ ọ be viẹ, a tẹ ta nọ: ‘Jesu o gine you Lazarọs gaga.’ Rekọ ejọ i je roro nọ: ‘Kọ fikieme o gbe ro siwi ei hi?’ Kọ eme Jesu o ti ru obọnana?

Jesu o te kpobọ uki na, yọ a rehọ utho ulogbo ruru unu uki na. Ọ tẹ ta nọ: ‘Wha ghelie utho na no.’ Mata ọ tẹ ta nọ: ‘Anwọ edẹ ene ena nọ o ro whu! O ti muhọ egbo no.’ Rekọ a te ghelie utho na no, Jesu ọ tẹ lẹ nọ: ‘Ọsẹ, me yere owhẹ rọkẹ epanọ who ro yo kẹ omẹ. Mẹ riẹ nọ who re yo kẹ omẹ ẹsikpobi, rekọ fiki ogbotu nana mẹ rọ tae via na re a riẹ nọ who vi omẹ.’ Ọ tẹ  rọ urru oruarua bo via nọ: “Lazarọs, nya via!” Oware igbunu jọ o tẹ via: Lazarọs o te no evaọ uki na ze, avọ ehọ nọ a rọ variẹ iẹe oma. Jesu ọ tẹ ta nọ: “Wha si ehọ na noi oma re ọ nyavrẹ.”

Ahwo buobu nọ a ruẹ oware nọ o via na, a te fi ẹrọwọ họ Jesu. Rekọ ejọ e tẹ nyae ta kẹ ahwo Farisi na. No umuo oke yena vrẹ, ahwo Farisi na a tẹ jẹ gwọlọ edhere kpobi nọ a re ro kpe Lazarọs avọ Jesu. Omọvo jọ evaọ usu ikọ 12 Jesu na nọ a re se Judas Iskariọt ọ tẹ lẹlẹ nyabru ahwo Farisi na ọ tẹ nọ ai nọ: ‘Bro igho wha te kẹ omẹ otẹrọnọ me fiobọhọ kẹ owhai mu Jesu?’ A tẹ rọwo nọ a rẹ kẹe ewẹ isiliva 30, fikiere Judas ọ tẹ jẹ gwọlọ uvẹ kpobi nọ o re ro ru Jesu te ahwo Farisi na obọ.