Evaọ okenọ Jesu ọ jọ kugbe ikọ riẹ evaọ uwou ehru na ọ ta kẹ ai nọ: ‘Whai kpobi wha te dhẹ siọ omẹ ba evaọ aso nana.’ Rekọ Pita ọ tẹ ta kẹe nọ: ‘Mẹ te dhẹ siọ owhẹ ba ha! Ahwo nọ a kiọkọ a tẹ make dhẹ se owhẹ ba dede, mẹ te dhẹ siọ owhẹ ba ha.’ Rekọ Jesu ọ tẹ ta kẹ Pita nọ: ‘Taure ọkpa o te ti bo, whọ te vro omẹ isiasa soso.’

Evaọ okenọ isoja na a rehọ Jesu kpohọ uwou Kayafas, ikọ na buobu a tẹ dhẹ. Rekọ ikọ ivẹ jọ i lele ahwo buobu nọ a je su lele isoja na. Yọ omọvo rai jọ họ Pita. Pita ọ ruọ evaọ ighẹ Kayafas, yọ ọ jẹ re-erae evaọ akotọ erae nọ a koko họ. Odibo ọmọtẹ jọ o te vuhu Pita, ọ tẹ ta nọ: ‘Mẹ riẹ owhẹ! Whọ jọ kugbe Jesu!’

Pita ọ tẹ ta nọ: ‘Ijo, mẹ hẹ’! Mẹ riẹ oware nọ whọ be ta na ha!’ Ọ tẹ nya kẹle igeti na. U kri hi, odibo ọmọtẹ ọfa jọ ọ tẹ wariẹ vuhu Pita, ọ tẹ ta kẹ ahwo nọ a jọ etẹe nọ: ‘Ọzae nana ọ jọ kugbe Jesu!’ Pita ọ tẹ ta nọ: ‘Mẹ tubẹ riẹ ohwo nọ a re se Jesu dede he!’ Ọzae jọ ọ tẹ ta nọ: ‘Whẹ yọ omọvo rai jọ, keme ẹmeọta ra o dhesẹ nọ whẹ yọ ohwo Galili, wọhọ Jesu.’ Pita o te duwu iyei inọ: ‘Mẹ riẹ ọzae nana ha!’

Ẹsiẹvo na, ọkpa ọ tẹ nwani bo. Pita ọ tẹ ruẹ Jesu nọ o kuoma rẹriẹ rri ei. Ọ tẹ kareghẹhọ ẹme nọ Jesu ọ ta kẹe, ọ tẹ ruọ otafe ọ tẹ viẹ gaga.

Ogbẹgwae Sanhẹdrin na soso a te kokohọ uwou Kayafas re a rehọ Jesu guẹdhọ. A tẹ jiroro nọ a re kpe Jesu, rekọ a gwọlọ oware nọ a re gu fihọ iẹe uzou re a ruẹsi kpei. Ghele na, a ruẹ oware ovo ho. Ukuhọ riẹ, Kayafas ọ tẹ nọ Jesu nọ: ‘Kọ whẹ họ Ọmọ Ọghẹnẹ?’ Jesu ọ tẹ ta nọ: ‘Mẹ họ ọye.’ Kayafas ọ tẹ ta nọ: ‘Ma gbẹ gwọlọ imuẹro efa ha. Ọ ta eme-aghọ no!’ Aikpobi a tẹ ta nọ: ‘Ọzae nana o re whu hrọ.’ A tẹ tehe iẹe, nwo eya ku ei,  ruru ovao rie jẹ bọwo iẹe, yọ a be ta kẹe nọ: ‘Otẹrọnọ whẹ ginọ ọruẹaro, vuẹ omai ohwo nọ ọ bọwo owhẹ na!’

Nọ oke o ke, a tẹ rehọ Jesu kpobọ ọgwa Sanhẹdrin rai, a tẹ wariẹ nọ Jesu nọ: ‘Kọ whẹ họ Ọmọ Ọghẹnẹ?’ Jesu o te yo nọ: ‘Whai ọvo wha ta riẹ na.’ Aikpobi a te brukpe Jesu inọ ọ ta eme-aghọ, jẹ rehọ iẹe kpobọ ọgwa osu nọ a re se Pọntiọs Pailet, ọba ahwo Rom. Kọ eme ọ via? Ma te ta kpahe onana evaọ uzoẹme nọ o rrọ aro na.