Nọ Jọn ọ jọ uwou-odi evaọ ukoliko nọ a re se Patmọs, Jesu o dhesẹ eruẹaruẹ 16 kẹe, erọ eware nọ e te via evaọ obaro. Eruẹaruẹ na i dhesẹ epanọ a ti ro ru odẹ Jihova fo, epanọ Uvie riẹ o te rọ ze, gbe epanọ a te rọ jọ otọakpọ na ru oreva Ọghẹnẹ wọhọ epanọ a rrọ obọ odhiwu ru.

Evaọ eruẹaruẹ jọ, Jọn ọ ruẹ Jihova nọ ọ keria agbara-uvie riẹ avọ oruaro evaọ obọ odhiwu, yọ ekpako 24 nọ i ku iwu efuafo gbe itu igoru họ a keria wariẹe họ. Elo ọnwranwra gbe edo egbrara i je no agbara-uvie na ze. Ekpako 24 na a te kigwẹ fihọ aro Jihova, a tẹ gọe. Evaọ eruẹaruẹ efa, Jọn ọ tẹ ruẹ ogbotu obuobu nọ o no erẹwho, erua, gbe erọunu kpobi ze nọ e be gọ Jihova. Jesu nọ ọ rrọ Omogodẹ na o te su ai kpohọ oria nọ ame uzuazọ ọ rrọ. Jọn ọ tẹ jọ eruẹaruẹ efa ruẹ Jesu nọ o bi su evaọ obọ odhiwu kugbe ekpako 24 na. Evaọ eruẹaruẹ efa, Jọn ọ ruẹ Jesu nọ o bi lele Setan araomuomu idudu na avọ idhivẹri riẹ fi ẹmo. Jesu o te gele Setan avọ idhivẹri riẹ no odhiwu ziọ otọakpọ.

 Jọn ọ tẹ ruẹ Omogodẹ na nọ o wo erru gaga avọ ahwo idu udhuhrẹ gbe ene (144,000) nọ a dikihẹ Ugbehru Zayọn. Ọ tẹ jẹ ruẹ enjẹle jọ nọ ọ be rra wariẹ akpọ na họ, yọ o bi whowho kẹ ahwo nọ a dhozọ Ọghẹnẹ jẹ kẹe oruaro.

Evaọ eruẹaruẹ efa nọ Jọn ọ ruẹ, a fi ẹmo Amagẹdọn. Evaọ ẹmo na, Jesu avọ egbaẹmo riẹ a fi Setan gbe akpọ omuomu riẹ kparobọ. Evaọ eruẹaruẹ urere, Jọn ọ tẹ ruẹ okugbe nọ ọ rrọ obọ odhiwu avọ akpọ. A raha Setan avọ idhivẹri riẹ gbe ahwo kpobi nọ a rrọ abọ rai no. Ahwo kpobi nọ a rrọ odhiwu gbe otọakpọ a te bi ru odẹ Jihova fo, jẹ gọ Jihova ọvo.