Nọ Owhe na o ku vrẹ no, emọ Noa avọ eyae rai a te yẹ emọ buobu. Emọ rai na a yẹ emọ buobu re, a te muhọ ẹvaha vọ eria sa-sa evaọ akpọ na, wọhọ epanọ Jihova ọ ta kẹ ae nọ a ru.

Rekọ ejọ i yoẹme kẹ Jihova ha. A ta nọ: ‘Ma bọ okpẹwho re ma rria etenẹ. Ma bọ uwou nọ u kpehru gaga, onọ o rẹ sai theri te obọ odhiwu. Re odẹ mai u do.’

 Oware nọ ahwo na a je ru na o were Jihova ha, fikiere ọ tẹ jiroro nọ ọ rẹ whaha ae. Kọ whọ riẹ oghẹrẹ nọ ọ rọ whaha ae? Jihova o ru nọ a jẹ rọ ta evẹrẹ sa-sa idudhe. Fikinọ a jẹ sae riẹ otọ ẹme nọ ohwohwo ọ be ta ha, a tẹ siọ uwou na ba ẹbọ. A te se odẹ okpẹwho nọ a jẹ bọ na Bebẹl, onọ otofa riẹ o rrọ “Ereghe.” Ahwo a tẹ jẹ kwa no etẹe kpohọ eria sa-sa evaọ otọakpọ na nyae rria. Rekọ a gbe je ru eware iyoma ghele evaọ eria nọ a kwa kpohọ na. Kọ ahwo jọ a gbẹ jariẹ nọ a you Jihova? Ma te riẹ kpahe onana evaọ uzoẹme nọ ma bi ti te na.