Josẹf yọ ọmọ Jekọp evaọ usu erọ emaha na. Inievo ekpako riẹ a riẹ nọ Josẹf ọsẹ rai ọ mai you. Kọ who roro nọ eva e jẹ were ae? Vievie! A jẹ re Josẹf ihri gaga yọ a mukpahe iẹe. Nọ Josẹf ọ wezẹ ewezẹ jọ, ọ tẹ vuẹ inievo riẹ kpahe ewezẹ na. A te roro nọ otọ ewezẹ na họ, ẹdẹjọ aikpobi a ti guzou kpotọ kẹ Josẹf. Onana o tẹ lẹliẹ ai mukpahe Josẹf vrẹta!

Ẹdẹjọ inievo Josẹf a tẹ jẹ rẹrote igodẹ ọsẹ rai evaọ ẹwho jọ nọ ọ kẹle Shẹkẹm. Jekọp o te vi Josẹf nyabru inievo riẹ re ọ riẹ epanọ eware e rrọ kẹ ae. Nọ a jọ ugbo ruẹ Josẹf nọ ọ be nyaze, a tẹ ta kẹ ohwohwo nọ: ‘Ọwezewezẹ na ọ be tha na. Ma kpei no.’ A te kru ei je gbolo iei fihọ ọgọdọ odidi jọ. Rekọ oniọvo riẹ jọ nọ a re se Juda ọ tẹ ta nọ: ‘Ma kpei hi, ma zẹe kpohọ igbo.’ Fikiere a tẹ zẹ Josẹf ewẹ isiliva 20 rọkẹ ehreki ahwo Midian nọ a je kpobọ Ijipti.

Inievo Josẹf a tẹ rọ azẹ ẹwe wholo ewu Josẹf, a tẹ whae se ọsẹ rai, a tẹ nọe nọ: ‘Kọ ogbẹrọnọ nọ ewu ọmọ ra?’ Fikiere Jekọp o te roro nọ arao ojihẹ jọ o kpe Josẹf no. Onana o lẹliẹ Jekọp viẹ gaga. Ohwo ọvo ọ sae jẹ sasa iẹe oma ha.

Nọ ahwo Midian a te obọ Ijipti, a tẹ zẹ Josẹf kẹ ọzae jọ nọ a re se Pọtifa. Rekọ Jihova ọ jọ kugbe Josẹf. Pọtifa o te muẹrohọ nọ Josẹf o re ruiruo ziezi, yọ a rẹ sai fievahọ iẹe. U kri hi, Pọtifa ọ tẹ rehọ Josẹf mu ọnọ o wuzou uwou riẹ soso.

Aye Pọtifa o te muẹrohọ nọ Josẹf o wo erru gaga yọ ọ goma ziezi. Fikiere kẹdẹ kẹdẹ ọ jẹ ta kẹ Josẹf nọ o lele ei wezẹ. Kọ eme  Josẹf o ru? Ọ se thahethahe, jẹ ta kẹ aye Pọtifa nọ: ‘Ijo! Oware nọ whọ be ta nọ ma ru na u woma ha. Whẹ yọ aye olori mẹ, yọ olori mẹ o fievahọ omẹ. Me te lele owhẹ wezẹ, mẹ te thọ uzi Ọghẹnẹ!’

Ẹdẹjọ, aye Pọtifa ọ tẹ jẹ gwọlọ gba Josẹf họ re o lele iei wezẹ. Ọ tẹ jabọ kru ewu riẹ, rekọ Josẹf ọ tẹ dhẹ se iẹe ba. Nọ Pọtifa o kpozi, aye riẹ o te gu nọ Josẹf ọ jẹ gwọlọ gbae họ lele iei wezẹ. Rekọ ọrue ọ ta na. Eva e tẹ dha Pọtifa gaga, o te gbolo Josẹf họ uwou-odi. Rekọ Jihova ọ nyasiọ Josẹf ba ha.