Anwọ oware wọhọ ikpe 40 soso emọ Izrẹl a rọ rrọ igbrẹwọ na. A fi ikpewho egaga buobu kparobọ no. Whaọ obọnana a wo fihọ ukiekpotọ Moab nọ o kẹle Ethẹ Jọdan, yọ a gwọlọ ruọ Ẹkwotọ Eyaa na. Ozọ emọ Izrẹl u je mu Belak ovie Moab keme o je roro nọ a gwọlọ rehọ otọ riẹ. Fikiere o te zizie ọzae jọ nọ a re se Belam ze re ọ nyaziọ obọ Moab te bọwo emọ Izrẹl ehao.

Rekọ Jihova ọ tẹ ta kẹ Belam nọ: ‘Whọ bọwo emọ Izrẹl ehao vievie he.’ Fikiere Belam ọ gbẹ rọwo nya ha. Belak ovie na ọ tẹ wariẹ zizie Belam orọ avọ isiava jẹ ta kẹe nọ ọ te kẹe oware kpobi nọ ọ gwọlọ. Rekọ Belam ọ rọwo ghele he. Ọghẹnẹ ọ tẹ ta kẹe nọ: ‘Whọ sae nya, rekọ ẹme nọ mẹ ta nọ whọ ta ọvo whọ rẹ ta.’

Belam ọ tẹ ruọ ehru eketekete riẹ bi kpobọ Moab. Ọ gwọlọ bọwo emọ Izrẹl ehao dede nọ Jihova ọ ta kẹe nọ o ru ere he. Enjẹle Jihova ọ tẹ romavia kẹ Belam isiasa soso evaọ edhere na. Belam ọ jẹ ruẹ enjẹle na ha rekọ eketekete riẹ ọ jẹ ruẹ e riẹ. Orọ ọsosuọ nọ eketekete na ọ ruẹ enjẹle na, ọ tẹ dhẹ ruọ ẹwọ. Orọ avivẹ nọ enjẹle na o dikihẹ edhere ọhwahwa nọ ugbẹhẹ o rrọ tabọ tabọ riẹ, ọ tẹ roma rẹrẹ ugbẹhẹ na, jẹ nyẹ owọ Belam yao ugbẹhẹ na. Orọ urere nọ eketekete na ọ wariẹ ruẹ enjẹle na, o te ruwẹ fihọ udevie edhere na. Evaọ isiasa na, Belam ọ rehọ ọkpọ riẹ fa eketekete na.

Nọ o via orọ avọ isiasa no, Jihova o te ru eketekete na ta ẹme. Eketekete na ọ tẹ nọ Belam nọ: ‘Fikieme whọ be rọ fa omẹ?’ Belam ọ tẹ ta kẹe nọ: ‘Keme whọ rọ omẹ zaharo. Ọgbọdọ ọ rrọ omẹ obọ enẹ yọ me kpe owhẹ no.’ Eketekete na ọ tẹ ta kẹe nọ: ‘Whọ dhẹ omẹ ikpe buobu no. Kọ me ru owhẹ enẹ no ẹdẹjọ?’

Kẹsena Jihova o te ru re Belam ọ ruẹ enjẹle na. Enjẹle na ọ tẹ ta kẹ Belam nọ: ‘Jihova ọ vẹvẹ owhẹ unu nọ whọ bọwo emọ Izrẹl  ehao ho.’ Belam ọ tẹ ta nọ: ‘Me ru thọ. Me ti zihe kpo.’ Rekọ enjẹle na ọ tẹ ta kẹe nọ: ‘Whọ sai kpobọ Moab, rekọ ẹme nọ Jihova ọ ta nọ whọ ta ọvo whọ rẹ ta.’

Kọ Belam o wuhrẹ oware jọ no onana ze? Ijo. Nọ Belam o te obọ Moab, ọ jẹ gwọlọ bọwo emọ Izrẹl ehao isiasa soso, rekọ isiasa na Jihova o ru nọ Belam ọ rọ ghale emọ Izrẹl. U kuhọ riẹ, emọ Izrẹl a te fi ahwo Moab kparobọ, je kpe Belam. Orọnọ Belam o yoẹme kẹ Jihova, kọ o gbẹ hai woma kẹe?