Jihova ọ tẹ ta kẹ Mosis nọ: ‘Nyabru omẹ ziọ obọ ugbehru na. Me ti kere izi mẹ họ ekpala itho, mẹ vẹ rehọ ai kẹ owhẹ.’ Mosis ọ tẹ gadiẹ kpobọ ugbehru na jẹ rria obei edẹ 40 gbe aso 40. Evaọ okenọ ọ rọ jọ obei na, Jihova o te kere Izi Ikpe na fihọ ekpala itho ivẹ, ọ tẹ rehọ ai kẹ Mosis.

Nọ omoke jọ o vrẹ no, emọ Izrẹl a te roro nọ Mosis ọ dhẹ siọ ai ba no. A tẹ ta kẹ Erọn nọ: ‘Ma gwọlọ ohwo nọ o re su omai. Ma ẹdhọ kẹ omai!’ Erọn ọ tẹ ta nọ: ‘Wha kẹ omẹ igoru rai.’ Erọn ọ tẹ ghra igoru na, jẹ rehọ iẹe ma ọmọ eruẹ. Ahwo na a tẹ ta nọ: ‘Ọmọ eruẹ nana họ Ọghẹnẹ mai nọ o su omai no Ijipti ze!’ A te mu ọmọ eruẹ igoru na họ ẹgọ, yọ a bi ru ehaa. Kọ oware nọ a ru na u woma? Ijo, keme a ya eyaa kẹ Jihova nọ ọye ọvo a te gọ. Rekọ obọnana a bi ru eyaa rai gba ha.

Jihova ọ ruẹ oware nọ a je ru na, fikiere ọ tẹ ta kẹ Mosis nọ: ‘Nwrotọ bru ahwo na. A bi yoẹme kẹ omẹ  hẹ, a mu ẹdhọ họ ẹgọ no.’ Mosis o te nwrotọ no obọ ugbehru na ze, yọ ọ wọ ekpala itho ivẹ na họ abọ.

Nọ ọ kẹle oria nọ ahwo na a rrọ no, o te yo edo ahwo nọ a be suile. Kẹsena ọ tẹ ruẹ ahwo na nọ a bi gbile yọ a bi guzou kpotọ kẹ ọmọ eruẹ igoru na. Eva e tẹ dha Mosis gaga. Ọ tẹ rọ ekpala itho ivẹ na fi otọ, e tẹ bẹre ehehẹhẹ. Ọ tẹ rehọ erae mahe ọmọ eruẹ igoru na. Mosis ọ tẹ nọ Erọn nọ: ‘Eme ahwo nana a ta kẹ owhẹ nọ who ro ru oware uyoma utiona?’ Erọn ọ tẹ ta nọ: ‘Eva e dha owhẹ hẹ. Whọ riẹ oghẹrẹ nọ ahwo nana a rrọ. A gwọlọ ọghẹnẹ nọ o re su ai, fikiere me te gbolo igoru nọ a kẹ omẹ fihọ erae, kọ etẹe ọmọ eruẹ nana o no ze!’ Oware nọ Erọn o ru na u woma ha. Mosis o te zihe kpobọ ugbehru na nyae lẹ Jihova re ọ rọvrẹ ahwo na.

Jihova ọ rọvrẹ ahwo nọ u no eva ze nọ a re yoẹme kẹe. Kọ whọ gbẹ ruẹ epanọ u wuzou te re emọ Izrẹl a ru lele ẹme Mosis?