Nọ Joshua o su emọ Izrẹl ikpe buobu no, o te ti whu evaọ okenọ ọ jọ ikpe udhusoi gbe ikpe (110). Okenọ Joshua ọ jọ akpọ, emọ Izrẹl a jẹ gọ Jihova. Rekọ nọ Joshua o whu no, a te mu edhọ họ ẹgọ wọhọ epanọ ahwo Kenan a je ru. Fikinọ emọ Izrẹl a gbẹ jẹ gọ Jihova ha, Jihova ọ tẹ kẹ ovie Kenan nọ a re se Jabin uvẹ re o ru akpọ bẹ ai. Emọ Izrẹl a tẹ jẹ viẹ se Jihova nọ o fiobọhọ kẹ ai. Fikiere Jihova ọ tẹ rehọ osu ọkpokpọ nọ a re se Berak mu kẹ ai. Osu ọkpokpọ nana o ti fiobọhọ kẹ ai zihe bru Jihova ze.

Ọruẹaro-aye jọ nọ a re se Debora o te vi ohwo nyai se Berak nọ ọ nyaze. Ọ tẹ ta kẹe nọ Jihova ọ ta nọ: ‘Rehọ ezae idu ikpe (10,000) lele oma, re wha nyai lele egbaẹmo Jabin họre evaọ ukiekpotọ Kashọn. Etẹe wha ti jo fi oletu egbaẹmo Jabin nọ a re se Sisera kparobọ.’ Berak ọ tẹ ta kẹ Debora nọ: ‘Otẹrọnọ who re lele omẹ, mẹ te nya.’ Debora ọ tẹ ta kẹe nọ: ‘Me ti lele owhẹ. Rekọ riẹ nọ whẹ họ ọnọ o ti kpe Sisera ha. Jihova ọ ta nọ aye o ti kpe Sisera.’

Debora o te gine lele Berak avọ egbaẹmo riẹ kpobọ Ugbehru Tabọ re a ruẹrẹ oma kpahe kẹ ẹmo na. Nọ Sisera ọ nwani yo  kpahe onana, o te koko egbaẹmo riẹ họ ukiekpotọ Kashọn na. Debora ọ tẹ ta kẹ Berak nọ: ‘Nẹnẹ na Jihova ọ te kẹ owhai obokparọ.’ Berak avọ egbaẹmo idu ikpe (10,000) riẹ a tẹ họrọ ruọ ukiekpotọ na bru egbaẹmo Sisera.

Jihova o te ru oso rrọ nọ ukiekpotọ na soso u ro ku ame. Ekẹkẹ-ẹmo Sisera i te zue ruọ ọloho na. Sisera o te nwrotọ no akẹkẹ-ẹmo riẹ je muhọ ẹdhẹ. Berak avọ egbaẹmo riẹ a te fi egbaẹmo Sisera kparobọ, rekọ Sisera ọ dhẹ vabọ! Sisera ọ tẹ dhẹ nyai dhere uwou aye jọ nọ a re se Jael. Aye na ọ tẹ kẹe imiliki da. Kẹsena Sisera o te kiẹzẹ, aye na ọ tẹ rehọ ohọ wowo iei. Fikinọ oma o rrọ Sisera no, owezẹ u te su ei vrẹ. Kẹsena Jael ọ tẹ kuẹlẹ ze jẹ tehe ububẹ fihọ uzou riẹ, Sisera o te whu.

Berak ọ tẹ gwọlọ Sisera te uwou Jael. Nọ Jael o no uwou ze ọ tẹ ta kẹ Berak nọ: ‘Ruọ uwou me dhesẹ ọzae nọ whọ be gwọlọ na kẹ owhẹ.’ Berak ọ tẹ ruọ uwou jẹ ruẹ Sisera nọ o whu fihọ otọ. Berak avọ Debora a tẹ suile ro jiri Jihova fikinọ o fiobọhọ kẹ ai fi ewegrẹ rai kparobọ. Evaọ ikpe 40 nọ i lele i rie, emọ Izrẹl a te wo udhedhẹ.