Ọmọ ọkpako Sọl ovie na nọ a re se Jonatan, ọ jọ ọgbaẹmo nọ o wo udu gaga. Devidi ọ tubẹ ta nọ Jonatan ọ vẹrẹ vi ọmọvra nọ a re se ugo, jẹ ga vi okpohrokpo. Evaọ ẹdẹjọ, Jonatan ọ tẹ ruẹ isoja ahwo Filistia evaọ ehru ugbehru jọ. Ọ tẹ ta kẹ ohwo nọ ọ rẹ wha eware ẹmo riẹ nọ: ‘Re ma te lele isoja na họre, Ọghẹnẹ ọ rẹ kẹ omai oka jọ tao. Otẹrọnọ ahwo Filistia na a tẹ ta kẹ omai nọ ma nya bru ai ze, ma vẹ riẹ nọ oke nọ ma re ro lele ai họre u te no.’ Kẹsena ahwo Filistia na a te bo nọ: ‘Wha nyaze ma họre!’ Jonatan avọ ohwo nọ ọ rẹ wha eware ẹmo riẹ, a tẹ gadiẹ kpobọ ehru ugbehru na je kpe isoja ahwo Filistia 20.

Fikinọ Jonatan họ ọmọ ọkpako Sọl, ọye ọ hae jọ ovie nọ Sọl o te whu no. Rekọ Jonatan ọ riẹ nọ Jihova ọ salọ Devidi no re ọ jọ ovie Izrẹl nọ u te no Sọl no, ghele na ọ re Devidi ihri hi. Jonatan avọ Devidi a te zihe ruọ egbẹnyusu ekpekpe. A tubẹ ya eyaa kẹ  ohwohwo nọ a te thọ je fiobọhọ kẹ ohwohwo. Jonatan ọ tẹ rehọ ewu, ọgbọdọ, uzei, gbe umueku riẹ kẹ Devidi, re e jọ oka usu nọ aimava a wo kugbe ohwohwo.

Okenọ Sọl o je ro le Devidi na, Jonatan ọ tẹ nyabru Devidi jẹ ta kẹe nọ: ‘Wo udu, ozọ u mu owhẹ hẹ. Jihova ọ salọ owhẹ no re whọ jọ ovie. Makọ ọsẹ mẹ dede ọ riẹ ere.’ Kọ whọ gwọlọ wo emamọ ogbẹnyusu wọhọ Jonatan?

Jonatan o tube fi uzuazọ riẹ họ ọza unuẹse buobu re ọ sai fiobọhọ kẹ Devidi ogbẹnyusu riẹ. Jonatan ọ riẹ nọ Sọl ọsẹ riẹ ọ gwọlọ kpe Devidi, fikiere ọ tẹ ta kẹ ọsẹ riẹ nọ: ‘Who te kpe Devidi yọ whọ raha uzi, keme o ru oware ovo thọ họ.’ Eva Jonatan e tẹ dha Sọl gaga. Nọ ikpe jọ e vrẹ no, Sọl avọ Jonatan a te whu evaọ ẹmo.

Nọ Jonatan o whu no, Devidi ọ tẹ nyae gwọlọ ọmọ Jonatan nọ a re se Mẹfiboshẹt. Nọ Devidi ọ ruẹ Mẹfiboshẹt, ọ tẹ ta kẹe nọ: ‘Fikinọ mẹ avọ ọsẹ ra ma jọ egbẹnyusu ekpekpe, mẹ te rẹrote owhẹ bẹsenọ who re whu. Ọgwa uvie mẹ whọ te rria, yọ ehru emẹjẹ mẹ whọ te jọ re emu.’ Jonatan ọ thọrọ Devidi ẹro vievie he.