Nọ Sọl o whu no, Devidi o te zihe ruọ ovie. Ikpe 30 ọ jọ evaọ oke yena. Nọ ikpe jọ e vrẹ no, aso ẹdẹjọ nọ Devidi o rri no ehru uwou riẹ ze, ọ tẹ ruẹ aye owoma jọ. Odẹ aye na Batshẹba, yọ osoja jọ nọ a re se Uraya họ ọzae riẹ. Devidi o te vi ohwo nyai se Batshẹba ziọ uwou riẹ. Kẹsena o te lele iei wezẹ, aye na o te dihọ. Devidi ọ tẹ jẹ gwọlọ kuọ oware na dhere. Ọ tẹ ta kẹ ọnọ o wuzou isoja riẹ nọ o fi Uraya họ obaro ẹmo na, re isoja nọ i kiọkọ a dhẹ se iẹe ba. Nọ Uraya o whu no, Devidi ọ tẹ rehọ Batshẹba.

Rekọ Jihova ọ ruẹ eware iyoma kpobi nọ Devidi o ru na. Kọ eme Jihova o ru? Jihova o te vi ọruẹaro riẹ jọ nọ a re se Netan bru Devidi. Netan ọ tẹ ta kẹ Devidi nọ: ‘Ọdafe jọ o wo igodẹ buobu, yọ oyegbere jọ o wo omogodẹ ọvo nọ o you gaga. Ọdafe na ọ tẹ rehọ omogodẹ ọvo oyogbere na.’ Eva e tẹ dha Devidi gaga, ọ tẹ ta nọ: ‘U fo nọ a re kpe ọdafe yena no!’ Netan ọ tẹ ta kẹ Devidi nọ: ‘Whẹ họ ọdafe ọyena!’ Oware na o kẹ Devidi uye gaga, fikiere ọ tẹ ta kẹ Netan nọ: ‘Mẹ thọ uzi Jihova no.’ Uzioraha nana o wha eware iyoma buobu se Devidi gbe uwou riẹ soso. Jihova ọ kẹ Devidi uye, rekọ Jihova ọ kẹ riẹ uvẹ re ọ gbẹ jọ ovie keme ọ rọwo nọ o ruthọ yọ o wo omaurokpotọ.

Devidi ọ jẹ gwọlọ nọ ọ rẹ bọ etẹmpol kẹ Jihova, rekọ Jihova ọ tẹ salọ ọmọ riẹ nọ a re se Solomọn re ọ bọ etẹmpol na. Devidi ọ tẹ ruẹrẹ eware nọ a te rọ bọ etẹmpol na kpahe kẹ Solomọn jẹ  ta nọ: ‘Etẹmpol Jihova na ọ te jọ ruaro avọ erru. Solomọn ọ gbẹ maha, rekọ me ti fiobọhọ kẹe ruẹrẹ eware kpahe.’ Devidi ọ zọhọ igho buobu ze re a rọ bọ etẹmpol na. Ọ ruẹrẹ ahwo nọ a wo onaa sa-sa fihọ. Ọ ruẹrẹ igoru gbe isiliva fihọ, ọ tẹ jẹ fa ire no obọ Taya avọ Saedọn ze. Nọ Devidi ọ kẹle uwhu no, o te dhesẹ oghẹrẹ nọ a te bọ etẹmpol na kẹ Solomọn. Ọ tẹ ta kẹ Solomọn nọ: ‘Jihova ọ ta kẹ omẹ nọ me kere eware nana fihọ otọ kẹ owhẹ. Jihova o ti fiobọhọ kẹ owhẹ. Ozọ u mu owhẹ hẹ. Thakpi wo udu re who ruiruo na.’