Jihova ọ kẹ emọ Izrẹl ibroziẹ nọ i re su ai, rekọ a tẹ ta nọ a gwọlọ ovie. A ta kẹ Samuẹle nọ: ‘Erẹwho nọ e wariẹ omai họ na kpobi a wo ivie. Ma gwọlọ ovie re.’ Oware nọ ahwo na a yare na o were Samuẹle he, fikiere ọ tẹ lẹ se Jihova kpahe onana. Jihova ọ tẹ ta kẹ Samuẹle nọ: ‘Orọnikọ owhẹ ahwo na a se he. Mẹ a be se na. Ta kẹ ae nọ a sai wo ovie rekọ ovie na ọ te gwọlọ eware buobu mi ai.’ Ghele na, ahwo na a ta nọ: ‘Oyena u te ẹme he. Ma gwọlọ ovie!’

Jihova ọ tẹ ta kẹ Samuẹle nọ ọzae jọ nọ a re se Sọl ọye ọ te jọ ovie ọsosuọ Izrẹl. Ẹdẹjọ nọ Sọl ọ nyabru Samuẹle evaọ ẹwho jọ nọ a re se Rema, Samuẹle o te ku ewhri họ Sọl uzou, onọ u dhesẹ nọ Ọghẹnẹ ọ salọ Sọl no re ọ jọ ovie Izrẹl.

Kẹsena Samuẹle o te se ahwo Izrẹl kpobi kokohọ re o dhesẹ ovie ọkpokpọ rai kẹ ai. Rekọ a gwọlọ Sọl bẹ, a rue e riẹ hẹ. Kọ whọ riẹ oware nọ o soriẹ ze? Keme Sọl o dhere. Nọ a te ruẹ Sọl, a tẹ rehọ iẹe dikihẹ udevie ahwo na kpobi re a ruẹ e riẹ. Sọl o theri vi ahwo na kpobi, yọ o wo erru gaga. Samuẹle ọ tẹ ta kẹ ahwo na nọ: ‘Ọna họ ọnọ Jihova ọ salọ.’ Ahwo na kpobi a te bo nọ: ‘Ajọ ovie na ọ rria tọ!’

Evaọ oke ọsosuọ Sọl ọ jẹ gaviezọ kẹ Samuẹle, yọ o je yoẹme kẹ Jihova. Rekọ nọ oke o be nyaharo na, o te ti nwene. Wọhọ oriruo, u fo nọ ovie o re dhe idhe he. Evaọ ẹdẹjọ, Samuẹle ọ tẹ ta kẹ Sọl nọ ọ hẹrẹ iẹe bẹsenọ ọ rẹ nyaze re o dhe idhe, rekọ Samuẹle ọ kake nyaze he. Fikiere Sọl ọvo o te dhe idhe na. Kọ eme Samuẹle o ru? Ọ ta kẹ Sọl nọ: ‘Who yoẹme kẹ Jihova ha.’ Kọ Sọl o wuhrẹ oware jọ no onana ze?

Evaọ oke ofa, nọ Sọl ọ jẹ gwọlọ nyai lele ahwo Amalẹk fi ẹmo, Samuẹle ọ tẹ ta kẹe nọ o kpe ahwo na kpobi no. Rekọ Sọl ọ tẹ nyasiọ ovie Amalẹk nọ a re se Egag ba. Jihova ọ tẹ ta kẹ Samuẹle nọ: ‘Sọl ọ nyasiọ omẹ ba no, ọ gbẹ be gaviezọ kẹ  omẹ hẹ.’ Eva e tẹ dha Samuẹle gaga, ọ tẹ ta kẹ Sọl nọ: ‘Fikinọ who yoẹme kẹ Jihova ha na, Jihova ọ te rọ ovie ọfa nwene owhẹ.’ Nọ Samuẹle o kuomarẹriẹ be gwọlọ nyavrẹ, Sọl ọ tẹ jabọ kru ewu riẹ, ewu na ọ tẹ bẹre. Samuẹle ọ tẹ ta kẹ Sọl nọ: ‘Jihova ọ rehọ uvie na mi owhẹ no.’ Jihova ọ te rọ uvie na kẹ omọfa nọ o you i rie je bi yoẹme kẹe.