Nọ Devidi o kpe Goliat no, Sọl ovie na ọ tẹ rehọ Devidi mu ọnọ o wuzou isoja riẹ. Devidi o fi kparobọ evaọ emo buobu, yọ odẹ riẹ u je do. Oke kpobi nọ Devidi o te no ẹmo kpozi, eyae na a ve mu ile họ egbe jẹ be so inọ: ‘Sọl o kpe idu ahwo rekọ Devidi o kpe idu ahwo ikpe!’ Onana o tẹ jẹ lẹliẹ Sọl re Devidi ihri, ọ tẹ gwọlọ epanọ o re ro kpei.

Devidi ọ riẹ epanọ a re kporo urete gaga. Ẹdẹjọ nọ Devidi o je kporo urete kẹ Sọl, Sọl ọ tẹ rọ ozuẹ ro fi Devidi. Rekọ Devidi o te ruwẹ, ozuẹ na o te duwu ruọ ugbẹhẹ na. Nọ oyena o vrẹ no, Sọl ọ tẹ jẹ gwọlọ oghẹrẹ kpobi nọ o re ro kpe Devidi. U kuhọ riẹ, Devidi ọ tẹ dhẹ kpobọ igbrẹwọ nyai dhere.

Sọl ọ tẹ rehọ isoja nọ i bu te idu esa (3,000) nyae gwọlọ Devidi. Evaọ ẹdẹjọ,  Sọl ọ tẹ ruọ eva eghogho utho nọ Devidi avọ isoja riẹ a dhere. Isoja Devidi a tẹ lẹlẹ ta kẹe nọ: ‘Uvẹ nọ who re ro kpe Sọl ona.’ Devidi ọ tẹ kuẹlẹ te oria nọ Sọl ọ rrọ, o te bru oria jọ ewu riẹ. Sọl ọ riẹ oware ovo nọ o via ha. Rekọ, udu Devidi u te je brukpei fikinọ ọ rọ adhẹe kẹ ovie nọ Jihova o ro mu hu. Devidi ọ kuvẹ re isoja riẹ i kpe Sọl ho. Kẹsena o te se Sọl, ọ tẹ ta kẹe nọ enẹ yọ o kpe rie no keme uvẹ na u rovie fihọ kẹe. Kọ onana o lẹliẹ Sọl nwene iroro?

Ijo. Sọl ọ gbẹ jẹ gwọlọ Devidi ghele. Evaọ aso ẹdẹjọ, Devidi avọ ọmọ oniọvo riẹ nọ a re se Abishai, a tẹ lẹlẹ nya ruọ evuẹ nọ Sọl avọ isoja riẹ a rrọ. Makọ Abna nọ o je roro Sọl ovie na dede, ọ wezẹ vrẹ. Abishai ọ tẹ ta kẹ Devidi nọ: ‘Uvẹ na u rovie no! Kẹ omẹ uvẹ me kpei no.’ Devidi ọ tẹ ta kẹ Abishai nọ: ‘Jihova o ti lele Sọl họre. Joma tọlọ ozuẹ gbe oware ame riẹ ọvo re ma kpo.’

Devidi ọ tẹ gadiẹ ugbehru jọ nọ o rẹriẹ ovao dhe evuẹ nọ Sọl avọ isoja riẹ a rrọ. O te bo nọ: ‘Abna, fikieme whọ gbẹ rọ thọ ovie na ha? Ozuẹ gbe oware ame Sọl o rrọ?’ Sọl o te vuhu urru Devidi, ọ tẹ ta nọ: ‘Enẹ yọ who kpe omẹ no, rekọ who ru ere he. Mẹ riẹ nọ whẹ họ ọnọ ọ te jọ ovie Izrẹl nọ u te no omẹ no.’ Sọl o te zihe kpobọ uwou riẹ. Rekọ orọnọ ahwo uwou Sọl kpobi a mukpahe Devidi hi.