Nọ Jezibẹl o yo nọ a kpe eruẹaro Ebale na kpobi no, eva e tẹ dhae gaga. O te vi uwou se Elaeja inọ: ‘Odẹnotha, me ti kpe owhẹ wọhọ epanọ who kpe eruẹaro Ebale na.’ Ozọ u te mu Elaeja gaga, ọ tẹ dhẹ nyai dhere obọ igbrẹwọ. Ọ tẹ lẹ nọ: ‘Jihova, o bẹ omẹ no, me te whu oye o mai woma.’ Fikinọ oma o rrọ Elaeja no, ọ tẹ wezẹ fihọ otọ ure jọ.

Enjẹle Ọghẹnẹ ọ tẹ rọwo iẹe jẹ rọ uvou uwowolẹ ta kẹe nọ: ‘Kpama whọ re emu.’ Elaeja ọ tẹ ruẹ ebrẹdi evaọ ehru itho eroro gbe oware ame. Nọ ọ re no, ọ tẹ da ame jẹ wariẹ kiẹzẹ. Enjẹle na ọ tẹ wariẹ rọwo iẹe jẹ ta kẹe nọ: ‘Re emu, keme ugbo nọ whọ be te nya na u thabọ gaga.’ Fikiere Elaeja ọ tẹ wariẹ re emu. Kẹsena ọ tẹ nya edẹ 40 gbe aso 40 bẹsenọ o ro te Ugbehru Horẹb. Elaeja ọ tẹ nya ruọ eghogho utho jọ, ọ tẹ wezẹ fihọ etẹe. Rekọ Jihova ọ tẹ ta ẹme kẹe. Jihova ọ ta kẹe nọ: ‘Eme who bi ru evaọ etenẹ, Elaeja?’ Elaeja o te yo nọ: ‘Emọ Izrẹl a gbẹ be rọwo gọ owhẹ hẹ. A raha agbada-idhe ra, a te je kpe eruẹaro ra kpobi no. Whaọ obọnana a gwọlọ kpe omẹ re.’

Jihova ọ tẹ ta kẹe nọ: ‘Nyai dikihẹ ehru ugbehru na.’ Orọ ọsosuọ, ofou ọgaga o te fou nya aro eghogho na vrẹ. Orọ avivẹ, otọ u te nuhu, kẹsena erae i te muhọ ẹware. Orọ avọ esa, Elaeja o te yo urru okakao jọ. Ọ tẹ rọ ewu riẹ ruru ovao riẹ jẹ nya no evaọ eghogho utho na ze, o te dikihẹ aro eghogho na. Jihova ọ tẹ nọe oware nọ o soriẹ ze nọ ọ rọ dhẹ. Elaeja ọ tẹ ta nọ: ‘Mẹ ọvo me kiọkọ.’ Rekọ Jihova ọ tẹ ta kẹe nọ: ‘Whẹ ọvo o kiọkọ họ. Ahwo nọ a bu te idu ihrẹ (7,000) soso a gbe kiọkọ evaọ Izrẹl nọ a gbẹ be gọ omẹ. Zihe kpo re whọ rọ Elaesha mu ọruẹaro nọ ọ te rehọ ẹta ra.’ U kri hi, Elaeja ọ tẹ nyai ru oware nọ Jihova ọ ta kẹe nọ o ru na. Kọ who roro nọ Jihova o ti fiobọhọ kẹ owhẹ re, otẹrọnọ who ru oware nọ ọ ta kẹ owhẹ nọ who ru? Ee, o ti ru ere. Joma wuhrẹ kpahe oware jọ nọ o via evaọ okenọ oso ọ jẹ rọ rrọ họ na.