Nọ Solomọn o zihe ruọ ovie Izrẹl no, Jihova ọ tẹ nọe nọ: ‘Eme whọ gwọlọ nọ mẹ kẹ owhẹ?’ Solomọn ọ tẹ ta nọ: ‘Mẹ yọ ọmaha gheghe, mẹ riẹ oware ovo ho. Ivie kẹ omẹ areghẹ nọ me re ro su ahwo ra.’ Jihova ọ tẹ ta kẹe nọ: ‘Nọ orọnọ areghẹ whọ yare na, me ti ru owhẹ họ ohwo nọ ọ mai wo areghẹ evaọ akpọ na soso. Me ti je ru owhẹ fe gaga. Who te yoẹme kẹ omẹ, mẹ te kẹ owhẹ uzuazọ uthethei.’

Solomọn o te mu etẹmpol na họ ẹbọ. Igoru, isiliva, ire, gbe itho nọ e mai woma ọ jẹ rọ bọ uwou na. Ezae gbe eyae buobu nọ i wo onaa iruo sa-sa ọ jẹ rọ bọ etẹmpol na. Ikpe ihrẹ soso Solomọn ọ rọ bọ etẹmpol na, kẹsena ọ tẹ rehọ iẹe mudhe kẹ Jihova. Etẹmpol na o wo agbada-idhe, yọ a dhe idhe fihọ ehru riẹ. Solomọn o te kigwẹ fihọ aro agbada-idhe na, ọ tẹ lẹ nọ: ‘O Jihova, etẹmpol nana yọ oware ovo kẹ owhẹ hẹ, yọ o woma te oria nọ whọ rrọ họ, rekọ ivie yo elẹ mai re whọ jẹ egagọ mai rehọ.’ Kọ Jihova ọ jẹ etẹmpol na rehọ, je yo olẹ Solomọn? Nọ Solomọn ọ nwane lẹ olẹ na re no, Jihova o te vi erae no ehru ze, e tẹ mahe idhe nọ a dhe fihọ ehru agbada-idhe na. Jihova ọ tẹ rọ enẹ dhesẹ nọ ọ jẹ etẹmpol na rehọ. Nọ emọ Izrẹl a ruẹ onana, eva e tẹ were ai gaga.

Areghẹ Solomọn o do ruọ otọ Izrẹl soso, je tube do ruọ erẹwho nọ i thabọ gaga dede. Nọ ahwo a te wo ẹme, a jẹ hai nyabru Solomọn ze re o fiobọhọ kẹ ai ku ẹme na họ. Makọ ovie-aye ẹwho jọ nọ a re se Shiba ọ nyaze te rọ enọ dawo areghẹ Solomọn. Nọ ovie-aye na ọ ruẹ oghẹrẹ nọ Solomọn ọ rọ kiyo enọ riẹ kpobi, ọ tẹ ta nọ: ‘Mẹ rọwo eware nọ ahwo a ta kẹ omẹ kpahe owhẹ vẹre he, rekọ obọnana mẹ ruẹ nọ who tube wo areghẹ vi oghẹrẹ nọ a dhesẹ owhẹ. Jihova Ọghẹnẹ ra ọ ginẹ ghale owhẹ.’ Emọ Izrẹl a jẹ reakpọ, yọ eva e jẹ were ai gaga. Rekọ eware i bi ti nwene.