Ahwo Asiria a fi erua ikpe Izrẹl kparobọ no. Yọ obọnana, ovie Asiria nọ a re se Senakerib, ọ be gwọlọ epanọ o re ro fi erua ivẹ Juda nọ i kiọkọ kparobọ. O te bi fi ewho Juda kparobọ unọjọ utọjọ. Rekọ ẹwho nọ ọ mae gwọlọ fi kparobọ họ Jerusalẹm. Rekọ Senakerib ọ riẹ nọ Jihova ọ be thọ Jerusalẹm hu.

Hẹzikaya ovie Juda ọ tẹ hwa igho buobu kẹ Senakerib re ọ nyasiọ Jerusalẹm ba. Dede nọ Senakerib o mi rie igho na, o vi egbaẹmo riẹ re a nyae họre Jerusalẹm ghele. Ozọ u je mu ahwo nọ a jọ Jerusalẹm gaga keme ahwo Asiria a kẹle rai oma no. Kẹsena Hẹzikaya ọ tẹ ta kẹ ai nọ: ‘Ozọ u mu owhai hi. Ahwo Asiria a ginẹ rrọ gaga, rekọ Jihova o ti fiobọhọ kẹ omai fi ai kparobọ.’

Senakerib o te vi ọgbaẹmo riẹ jọ nọ a re se Rabshakẹ kpobọ Jerusalẹm, re ọ nyae rehọ ahwo Jihova jijehwẹ. Rabshakẹ o te dikihẹ otafe okpẹwho Jerusalẹm je bo nọ: ‘Jihova ọ te sai fiobọhọ kẹ owhai hi. Wha kuvẹ re Hẹzikaya ọ viẹ owhai họ họ. U wo ọghẹnẹ ọvuọvo nọ ọ rẹ sai siwi owhai no abọ mẹ hẹ.’

Hẹzikaya ọ tẹ lẹ se Jihova re o fiobọhọ kẹ ae riẹ oware nọ a re ru. Jihova o te yo kẹe nọ: ‘Ozọ eme Rabshakẹ u mu owhẹ hẹ. Senakerib ọ te sai fi Jerusalẹm kparobọ họ.’ Kẹsena Senakerib o te kere ileta jọ se Hẹzikaya. Enẹ o kere fihọ ileta na: ‘Wha gbẹ rẹroso Jihova ha, keme ọ te sai siwi owhai hi.’ Hẹzikaya ọ tẹ lẹ se Jihova nọ: ‘Ivie Jihova, siwi omai, re ahwo kpobi a riẹ nọ whẹ họ Ọghẹnẹ uzẹme na.’ Jihova ọ tẹ ta kẹe nọ: ‘Ovie Asiria ọ te sae rueva Jerusalẹm hu. Mẹ te thọ okpẹwho mẹ na.’

Senakerib o je roro nọ u ti kri hi re o te fi Jerusalẹm kparobọ. Rekọ evaọ aso ẹdẹjọ, Jihova o te vi enjẹle riẹ ziọ oria nọ isoja ahwo  Asiria a jọ evaọ otafe Jerusalẹm. Enjẹle na o te kpe isoja ahwo Asiria nọ i bu te idu udhe-uzii gbe isoi (185,000) soso! Isoja egaga Senakerib na kpobi a te whu. Senakerib ọ gbẹ sai ru oware ovo ho, o te kpo. Jihova ọ thọ Hẹzikaya gbe okpẹwho Jerusalẹm soso wọhọ epanọ ọ ya eyaa riẹ. Otẹrọnọ whọ jọ Jerusalẹm evaọ oke oyena, kọ whọ hai ti fievahọ Jihova?