Jezibẹl o yẹ ọmọtẹ jọ nọ a re se Atalaya, yọ ọ geva wọhọ oni riẹ Jezibẹl. Ovie Juda ọye ọ rehọ Atalaya. Nọ ovie na o whu no, ọmọ riẹ o te muhọ esu. Rekọ nọ ọmọ na o whu no, Atalaya ọ tẹ rọ omariẹ mu ovie Juda. Kẹsena ọ tẹ gwọlọ nọ o re kpe emezae ovie na kpobi no, makọ iruọmọ riẹ dede. Ohwo kpobi ọ jẹ dhozọ riẹ.

Ozerẹ okpehru nọ a re se Jehoada avọ aye riẹ nọ a re se Jẹhosheba a riẹ nọ oware nọ Atalaya o bi ru na u yoma gaga. A te si oruọmọ Atalaya nọ a re se Jẹhoash no re Atalaya ọ se ẹe ba ekpe, dede nọ onana o lẹliẹ uzuazọ rai jọ ọza. A tẹ yọrọ Jẹhoash evaọ obọ etẹmpol na.

Nọ Jẹhoash o te ikpe ihrẹ no, Jehoada o te se ahwo Livai na gbe iletu na koko, jẹ vuẹ ae nọ: ‘Wha roro ethẹ etẹmpol na, wha jọ ohwo ọvo ọ ruẹe eva ha.’ Kẹsena Jehoada ọ tẹ rehọ Jẹhoash mu ovie Juda, ọ tẹ rehọ etu-uvie ro tu iei. Ahwo Juda kpobi a te bo nọ: ‘Ajọ ovie na ọ rria tọ!’

Nọ Atalaya o yo edo ahwo nọ a bi bo, ọ tẹ họrọ kpobọ etẹmpol na. Nọ ọ ruẹ ovie ọkpokpọ na, o te bo nọ: “Iyẹ yo! Iyẹ yo!” Iletu na a tẹ jabọ kru Atalaya, a te si ei ruọ otafe je kpei no. Kọ ẹvẹ kpahe eware iyoma nọ o ru kpobi no evaọ orẹwho na?

Jehoada o fiobọhọ kẹ orẹwho na soso reọvọ kugbe Jihova. Ahwo na kpobi a tẹ ya eyaa nọ Jihova ọvo a rẹ gọ. Jehoada ọ tẹ vuẹ ahwo na re a kporo etẹmpol Ebale gbe emedhọ nọ e jọ orẹwho na kpobi fihọ otọ. Ọ tẹ rehọ izerẹ na gbe ahwo Livai mu  re a ru etẹmpol na fo, re ahwo a sae wariẹ jọ eva riẹ gọ Jihova. Ọ tẹ rehọ ahwo mu nọ a re roro unuẹthẹ etẹmpol na, re ahwo nọ a fo ho a siọ etẹmpol na ba ẹruọ. Kẹsena Jehoada avọ iletu na a tẹ rehọ Jẹhoash kpobọ uwou nọ a bọ kẹ ovie, a tẹ rehọ iẹe keria agbara-uvie na. Eva e tẹ were ahwo Juda gaga. Obọnana a sae gọ Jihova ababọ ozọ Atalaya ovie-aye ọgeva na, yọ a wo ufuoma no egagọ Ebale no. Kọ whọ gbẹ ruẹ epanọ udu nọ Jehoada o wo o sai ro fiobọhọ kẹ ahwo buobu?