WHO riwi Keni avọ Ebẹle enẹna. Ai mava a kpako no. Keni o ti zihe ruọ ọwhẹrẹ. Ọ rẹ kọ ekakọ, ibi-ire gbe ebe-erọrọ.

Ebẹle o ti zihe ruọ othuru igodẹ. Ọ rẹ gwọlọ rọ ẹro te imigodẹ esese. E rẹ rro fihọ igodẹ ilogbo, fikiere Ebẹle o te ti wo uthuru igodẹ ososo nọ ọ rẹ rọ ẹro te.

Ẹdẹ jọ Keni avọ Ebẹle a tẹ rehọ akpẹwẹ se Ọghẹnẹ. Keni ọ tẹ wha emuore jọ nọ o vu. Ebẹle ọ tẹ wha ogodẹ riẹ nọ ọ mai woma kpobi. Ebẹle avọ akpẹwẹ riẹ e tẹ were Jihova eva gaga. Rekọ Keni avọ akpẹwẹ riẹ e were riẹ hẹ, kọ whọ riẹ oware nọ osoriẹ?

Orọnikọ fiki epanọ akpẹwẹ Ebẹle o woma vi ọrọ Keni ọvo ho. Fiki nọ Ebẹle yọ ohwo owoma. O you Jihova avọ oniọvo riẹ. Rekọ Keni ohwo oyoma; o you oniọvo riẹ hẹ.

Fikiere Ọghẹnẹ ọ tẹ ta kẹ Keni nọ o nwene idhere riẹ. Rekọ Keni ọ gaviezọ họ. Eva e tẹ be dhae gaga fiki nọ Ebẹle ọ mae were Ọghẹnẹ. Koyehọ Keni ọ ta kẹ Ebẹle nọ ‘ma kpohọ obọ ẹwọ.’ Nọ ae ọvo a jọ obei, Keni ọ tẹ tehe Ebẹle oniọvo riẹ. Ọ tehe riẹ ga te epanọ o ro kpei whu. Kọ oware oyena nọ Keni o ru na u gbe yoma hrọ?

Dede nọ Ebẹle o whu ghele na, Ọghẹnẹ ọ gbẹ be kareghẹhiẹe. Ebẹle ọ jọ ohwo owoma, yọ ohwo otiọye ọ rẹ thọrọ Ọghẹnẹ ẹro ho. Fikiere ẹdẹ jọ Jihova Ọghẹnẹ o ti zihe Ebẹle ze uzuazọ. Eva oke oyena Ebẹle o gbe du whuẹ hẹ. Ọ sae te ria eva otọakpọ onana bẹdẹ bẹdẹ. Kọ u gbe woma re ma riẹ ahwo wọhọ Ebẹle?

Rekọ ahwo wọhọ Keni a rẹ were Ọghẹnẹ hẹ. Fikiere nọ Keni o kpe oniọvo riẹ no, Ọghẹnẹ ọ tẹ kẹe uye ẹkwoma ele nọ o leriei thethabọ no ahwo uviuwou riẹ. Oke nọ Keni ọ jẹ nyavrẹ e ria eva abọfa otọakpọ na, ọ tẹ rehọ oniọvo-ọmọtẹ riẹ jọ lele oma, kọ ọye ọ te jọ aye riẹ.

Oke u te, Keni avọ aye riẹ a te mu emọ họ ewo. Emezae gbe emetẹ Adamu avọ Ivi efa a tẹ rọo orọo re, koyehọ a wo emọ re. U ri kri hi na, ahwo buobu a tẹ te jọ otọakpọ na. Jọ ma wuhrẹ kpahe ejọ rai.