LỌT avọ uviuwou riẹ a je lele Abraham ria eva otọ Kenan. Ẹdẹ jọ Abraham ọ tẹ ta kẹ Lọt: ‘Otọ o rọ etenẹ nọ o rẹ gba erao mai kpobi hi. Iviena, j’oma hẹriẹ. Who te kpohọ abọ jọ, me ve kpohọ abọ nọ o kiọkọ.’

Lọt ọ tẹ kpare aro ri otọ na. Ọ tẹ ruẹ abọ orẹwho na nọ u wo ame gbe emamọ ẹbe kẹ erao riẹ. Onana họ ubrotọ Jọdan. Fikiere Lọt ọ tẹ rehọ uviuwou gbe erao riẹ kpoho obei. A te ti ru uwou rai fihọ okpẹwho Sodọm.

Ahwo Sodọm a jọ yoyoma gaga. Onana o dha Lọt eva gaga keme ọye ohwo owoma ọ jọ. O dha Ọghẹnẹ eva gaga re. Urere riẹ, Ọghẹnẹ o te vi enjẹle ivẹ e vẹvẹ Lọt unu nnọ ọye ọ te raha Sodọm avọ okpẹwho Gomora nọ ọ kẹle riẹ fiki eyoma rai.

Injẹle na e tẹ ta kẹ Lọt: ‘Ovẹrẹ! Rehọ aye ra gbe emetẹ ivẹ ra re wha no etenẹ no!’ Lọt avọ uviuwou riẹ a dina kpẹlẹ eva ẹnya vrẹ, fikiere injẹle na i te kru’ai obọ a je sua’i no okpẹwho na no. Koyehọ omọvo injẹle na ọ ta nọ: ‘Wha dhẹ ohrẹ kẹ uzuazọ rai! Wha rri emu hu. Wha dhẹ kpo obọ igbehru na, re wha seba ewhuo.’

Lọt avọ emetẹ ivẹ riẹ a te yo ẹme, koyehọ a dhẹ no Sodọm no. Ae a daji ẹsiẹvo ho, yọ a rri emu gbe he. Rekọ aye Lọt ọ ghọẹmeeyo. Nọ a dhẹ omojọ no Sodọm no, ọ tẹ daji, je rri emu. Koyehọ aye Lọt o zihe ruọ ukulu uwhe. Whọ sae rue riẹ eva ifoto na?

Ma sai wuhrẹ omamọ uwuhrẹ no onana tha. U dhesẹ k’omai nọ Ọghẹnẹ o re siwi enọ i yo ẹme kẹe, rekọ enọ i yo ẹme kẹe he, uzuazọ rai u re vrẹ.