EMEZAE ivẹ nọ e rọ etenẹ na i wo ohẹriẹ, ogbẹrọ ere? Whọ riẹ edẹ rai? Ozuẹ na yọ Esọ, ọmọzae nọ ọ be rehọ ẹro te igodẹ na yọ Jekọp.

Esọ avọ Jekọp yọ emezae ejime ọ Aiziki avọ Rebeka. Esọ were Aiziki ọsẹ na gaga, keme emamọ ozuẹ ọ jọ nọ ọ jẹ hẹ wha emu ze nọ uviuwou na o rẹ ria. Rekọ Jekọp ọye Rebeka ọ mai you, keme ọmọzae owowolẹ, dhedhẹ ọ jọ.

Abraham ọsẹ-ologbo ọ gbẹ jọ uzuazọ, yọ ma sai roro epanọ o rẹ were Jekọp te, re ọ gaviezọ kẹe be t’ẹme kpahe Jihova. Abraham o te ti whu eva oke nọ ọ kpako te ikpe 175, yọ ejime na e kpako te ikpe 15.

Okenọ Esọ ọ kpako te ikpe 40, ọ tẹ rọo eya ivẹ no otọ Kenan ze. Onana o wha uweli se Aiziki avọ Rebeka gaga, keme eya enana e jẹ gọ Jihova ha.

Ẹdẹ jọ oware jọ o tẹ via nọ u ru Esọ dheva mukpahe Jekọp oniọvo riẹ. Oke u te nọ Aiziki ọ rẹ rọ rehọ oghale kẹ ọmọzae ọkpako riẹ. Fiki nọ Esọ ọ kpako vi Jekọp, Esọ o te rẹro nọ ọye o re ti wo oghale na. Rekọ yọ Esọ ọ zẹ uvẹ nọ o re ro wo oghale na kẹ Jekọp no. Ofariẹ, okenọ a yẹ emezae ivẹ na, Ọghẹnẹ ọ ta nọ Jekọp o re ti wo oghale na. Kọ oye o via. Aiziki ọ tẹ rehọ oghale na kẹ Jekọp ọmọzae riẹ.

Uwhruemuna, nọ Esọ ọ riẹ kpahe onana, eva e tẹ dhae gaga kpahe Jekọp. Eva e dha riẹ ga te epanọ ọ rọ ta nọ o re kpe Jekọp. Nọ Rebeka o yo kpahe onana, u te kpokpiei gaga. Fikiere ọ tẹ ta kẹ Aiziki ọzae riẹ nọ: ‘U re yoma hrọ otẹrọnọ Jekọp ọ nya e rọo omọvo eyae Kenan enana re.’

Nọ o yo onana, Aiziki o te se Jekọp ọmọzae riẹ, ọ tẹ ta kẹe nọ: ‘Whọ jọ Kenan rọo aye ọvuọvo ho. Ukpoye kpohọ obọ uwou Bẹthuẹl ọsẹ-ologbo ra eva obọ Heran. Rọo omọvo emetẹ Leban ọmọzae riẹ.’

Jekọp ọ gaviezọ kẹ ọsẹ riẹ, ọ tẹ nwane nya vrẹ eva erẹ othethabọ na bi kpohọ obonọ imoni riẹ e jẹ ria eva Heran.