JOSẸF ọ gwọlọ riẹ sọ imoni ekpako 10 riẹ na a gbe wo eva iyoma kpahiẹe. Fikiere ọ tẹ ta nọ: ‘Whai ekiotọ. Wha nyaze te gwọlọ re wha riẹ oria nọ orẹwho mai o jẹ ko.’

A tẹ ta nọ, ‘Ijo, mai ekiotọ họ. Mai ahwo oruọzewọ. Mai kpobi emọ ọsẹ ọvo. Mai 12 vẹre. Rekọ ọvo ọ gbẹ rọ họ, yọ ọnọ ọ mae maha ọ rọ ob’uwou kugbe ọsẹ mai.’

Josẹf o te ru wọhọ nọ o fieva hae he. Ọ tẹ sẹro omoni nọ a re se Simiọn fihọ uwou-odi, ọ tẹ k’uvẹ nọ enọ ikiọkọ a rehọ emuore re a kpo. Rekọ ọ tẹ ta kae: ‘Oke nọ wha re zihe tha, wha rẹ rehọ omoni ọmaha rai kpobi tha hrọ.’

Okenọ a zihe te uwou obọ Kenan, imoni na i te gbiku eware nọ e via na kpobi kẹ Jekọp ọsẹ rai. Jekọp o weli gaga. O te bo: ‘Josẹf ọ gbẹ rọ họ, enẹna Simiọn ọ gbẹ rọ gbe he. Mẹ rẹ k’owhai uvẹ nọ wha rehọ Bẹnjamin ọmọzae mẹ nọ ọ mae maha na ha.’ Rekọ nọ emuore rai o je muhọ ere no, o tẹ gba Jekọp họ nọ ọ kẹ ae uvẹ re a rehọ Bẹnjamin kugbe kpohọ obọ Ijipti re a sae gbe wo emuore ọfa.

Enẹna Josẹf ọ tẹ ruẹ imoni riẹ nọ e be nya tha. Eva e were riẹ gaga nọ ọ rọ ruẹ Bẹnjamin oniọvo ọmaha riẹ. Wọhọ epanọ whọ riẹ, ae ọvuọvo ọ riẹ nọ ohwo ologbo ọnana yọ Josẹf ho. Enẹna Josẹf o te ru oware jọ rọ dawo emọ-ọsẹ 10 riẹ na.

Ọ ta kẹ idibo riẹ re a rehọ emuore vọ ekpa rai kpobi. Rekọ, ababọ ẹ ta nọ ọ ta kae, o te je fi emamọ egho isiliva riẹ na họ ẹkpa Bẹnjamin. Nọ a jẹ wọ ruọ edhere jẹ nya ugbo jọ no, Josẹf o te vi idibo jọ bi lai. Nọ a je lai mu, idibo na e tẹ ta: ‘Fikieme wha je tho egho isiliva olori mai?’

Imoni na kpobi e tẹ ta nọ: ‘Ma tho egho riẹ hẹ. Wha tẹ jọ obọ mai ọjọ ruẹ egho na, jọ a kpe ohwo ọyena.’

Koyehọ idibo na e kiẹ ekpa na kpobi rri, a tẹ ruẹ egho na eva ẹkpa Benjamin, nwanọ epanọ whọ be ruẹ eva etenẹ na. Idibo na e tẹ ta: ‘Whai enọ i kiọkọ kpobi a sai kpo, rekọ Bẹnjamin o re lele omai.’ Kọ eme emọ-ọsẹ 10 na a re ruẹ enẹna?

Ai kpobi a te lele Bẹnjamin zihe kpohọ obọ uwou Josẹf. Josẹf ọ tẹ ta kẹ imoni riẹ: ‘Whai kpobi a sai kpo obọ uwou rai, rekọ Bẹnjamin ọ rẹ jọ etenẹ wọhọ ọrigbo mẹ.’

Juda ọ tẹ kpare unu, ọ tẹ ta nọ: ‛Me te zihe kpohọ obọ uwou ababọ ọmọzae na, ọsẹ mẹ o re ti whuẹ keme o you rie thesiwa. Fikiere, iviena kru omẹ fihọ obonẹ wọhọ ọrigbo ra, rekọ jọ ọmọzae na o kpo.’

Josẹf ọ tẹ ruẹ nọ imoni riẹ i nwene no. Ae a gbe wo eva iyoma ha. Jọ ma gwọlọ ruẹ oware nọ Josẹf o ru enẹna.