OHRỌ ọzae ọnana nọ ọ be mọ na o re owhẹ? Odẹ riẹ Job, aye na yọ aye riẹ. Whọ riẹ ẹme nọ ọ be ta kẹ Job na? ‘La Ọghẹnẹ eka re who whu.’ Jo ma ruẹ oware nọ osoriẹ ze nọ ọ jẹ ta oghẹrẹ ẹme otiọye, gbe oware nọ osoriẹ ze nọ Job ọ jẹ ruẹ uye te ere.

Job yọ ohwo ẹrọwọ nọ o yoẹme Jihova. Ọ jẹ ria otọ Ọz, nọ o kẹle Kenan. Jihova o you Job gaga, rekọ ohwo jọ ọjọ nọ o mukpahiẹe. Whọ riẹ ohwo ọyena?

Ọyena họ Setan Ẹdhọ na. Kareghẹhọ, Setan họ ẹnjẹle oyoma na nọ o mukpahe Jihova. Ọ sai ru nọ Adamu avọ Ivi a rọ ghọẹmeeyo kẹ Jihova, o te roro nọ ọ sai ru nọ ahwo kpobi a jẹ ghọẹmeeyo kẹ Jihova re. Rekọ ọ sai ru ere? Ijo. Faki roro kpahe ezae gbe eyae ẹrọwọ buobu nọ ma wuhrẹ kpahe no na. Bro rai whọ sai se odẹ?

Okenọ Jekọp avọ Josẹf a whu no eva obọ Ijipti, Job họ ohwo nọ ọ mai wo ẹrọwọ kpahe Jihova eva otọakpọ na soso. Jihova ọ gwọlọ re Setan ọ riẹ nọ ọ sai ru ahwo kpobi re a yoma ha, fikiere ọ tẹ ta nọ: ‘Rri Job. Rri epanọ o fievahọ omẹ te.’

Setan ọ tẹ vravro: ‘O fievahọ keme whọ ghale riẹ o te wo eware iwoma buobu. Rekọ who te si enana no, ọ rẹ la owhẹ eka.’

Fikiere Jihova ọ tẹ ta nọ: ‘Whọ nya. Sia’i no. Ru eware iyoma nọ whọ gwọlọ kpobi kẹ Job. Ma te ruẹ sọ ọ te la omẹ eka. Ajokpa nọ who re kpe uzuazọ riẹ hẹ.’

Ọsosuọ, Setan ọ tẹ ruẹ nọ ahwo a tho iruẹ gbe ekamẹle Job, a te je kpe igodẹ riẹ. Koyehọ ọ rehọ ofou-owhre kpe emezae 10 gbe emetẹ riẹ. Kẹsena Setan ọ tẹ rehọ ẹyao ọgaga ọnana tehe Job. Job ọ ruẹ uye gaga. Fiki oye aye Job ọ jẹ ta kẹe nọ: ‘La Ọghẹnẹ eka re who whu.’ Rekọ Job ọ rọwo ru ere he. Ofariẹ, egbẹnyusu erue esa jọ e nyaze a tẹ ta kẹe nọ ọye o yere uzuazọ uyoma. Rekọ Job o gbe kru ẹrọwọ riẹ.

Onana u ru Jihova eva were gaga, uwhruemuna ọ tẹ ghale Job, wọhọ epanọ whọ be ruẹ eva ifoto na. O te si yei no ẹyao riẹ. Job o te wo emọ iwowoma 10 efa, gbe iruẹ, igodẹ avọ ekamẹle akuava enọ o wo vẹre.

Who ti fievahọ Jihova ẹsikpobi wọhọ Job? Who te ru ere, Ọghẹnẹ ọ te ghale owhẹ re. Whọ sae te ria bẹdẹ bẹdẹ okenọ a te ru otọakpọ na kpobi fihọ wowoma wọhọ ogege Idẹn.