WHỌ riẹ oware ọsosuọ nọ Noa o ru nọ ọe avọ ekru riẹ a no eva ak na ze? O ru akpẹwẹ hayo okẹ rọ kẹ Ọghẹnẹ. Whọ sae rue riẹ nọ o bi ru onana eva ifoto nọ e rọ obotọ na. Noa ọ kẹ okẹ erao onana re o ro yere Ọghẹnẹ fiki nọ o siwi uviuwou riẹ no owhe ologbo na.

Who roro nọ okẹ na o were Jihova? Ẹhẹ, o were riẹ. Fikiere ọ tẹ ya kẹ Noa nọ ọe ọ gbẹ rehọ owhe raha akpọ na ofa ha.

U ri kri hi, otọ na o tẹ ya no, Noa avọ uviuwou riẹ a te mu uzuazọ okpokpọ họ eva otafe ak na. Ọghẹnẹ ọ ghale rae ọ tẹ ta kae nọ; ‘Wha re wo emọ buobu. Wha re vi gaga bẹsenọ otọakpọ na o rẹ vọ avọ ahwo.’

Rekọ oke ofa, nọ ahwo a te yo kpahe owhe ologbo na ozọ o sai muai sọ oware utioye o te wariẹ via. Fikiere Ọghẹnẹ ọ tẹ kẹ oware jọ nọ o rẹ kareghẹhọ ahwo kpahe eya riẹ nọ ọ gbẹ rehọ owhe ku otọakpọ na soso ofa ha. Whọ riẹ oware nọ ọ kẹ re o kareghẹhai? Oye họ usi-ame.

A rẹ jọ ehru ruẹ usi-ame okenọ ọre ọ tẹ bẹ ze lele oso. Isi-ame i re wo egheghẹrẹ ame iwowoma buobu. Kọ whọ ruẹ ojọ no? Whọ be ruẹ onọ o rọ ifoto na?

Ona họ onọ Ọghẹnẹ ọ ta. ‘Mẹ ya nọ oke ovuovo o gbẹ jọ nọ owhe ọ rẹ raha t’ahwo t’erao kpobi hi. Me bi fi usi-ame mẹ họ ẹgho na. Nọ usi-ame na o tẹ rehọ oma via, mẹ rẹ rue riẹ jẹ kareghẹhọ eya mẹ enana.’

Fikiere, whọ tẹ ruẹ usi-ame, eme o rẹ kareghẹhọ owhẹ? Ẹhẹ, eya Ọghẹnẹ nnọ ọ gbẹ rehọ owhe ologbo raha akpọ na kpobi ofa ha.