RRI oware nọ ọzae nana o bi sino họ eva uwoudhu riẹ! Otogbo erru gbe ubiọkpọ oro gbe ewẹ idọlọ. Ọ rehai no okpẹwho Jeriko na ze. Rekọ ẹvẹ a heru eware Jeriko na vẹre? Kọ whẹ kareghẹhọ?

A hae te rahai no, oro na gbe idọlọ a ve fiai họ ẹkpa ọ uwoudhu Jihova. Fikiere ahwo nana ayo ẹme Ọghẹnẹ hẹ. A tho oware nọ orọ orọ Ọghẹnẹ. Odẹ ọzae na họ Ekan, e nọ e rọ kugbei họ abọ uviuwou riẹ. Jọ ma ruẹ oware nọ ovia.

Nọ Ekan otho eware nana no, Joshua o te vi ezae jọ nya e họre okpẹwho ọ Ai. Rekọ a fi rai kparobọ eva ẹmo na. A kpe e jọ rai, e nọ ikiọkọ edhẹ vabọ. Joshua oweri gaga. O te kiẹzẹ va ovao tuẹkpẹ be lẹ kẹ Jihova: ‘Fikieme whọ jẹ jọ onana via k’omai?’

Jihova ọ kẹ uyo: ‘Kparoma! Izrẹl thọ uzi. A rehọ eware jọ nọ a hae raha hayo nọ a hai fihọ uwoudhu Jihova. A tho otogbo erru a tẹ kuẹi dhere. Mẹ te ghale owhai hi bẹsenọ wha rẹ te raha eware na, gbe ọnọ otho eware na no.’ Jihova ọ ta kẹ Joshua nọ o ti dhesẹ ohwo oyoma na rọkẹe.

Koyehọ Joshua o koko ahwo na kpobi họ, Jihova ọ tẹ riobọhọ Ekan ohwo yoma na. Ekan ọ tẹ ta nọ: ‘Mẹ raha uzi no. Mẹ ruẹ otogbo erru, gbe ubiọkpọ oro gbe ewẹre idọlọ. I si omẹ urru gaga fikiere mẹ jẹ tọ lae. Wha te rue rai me si rai no họ eva uwoudhu mẹ.’

Okenọ a ruẹ eware nana no a tẹ re hai se Joshua, ọ tẹ ta kẹ Ekan nọ: ‘Fikieme who je si uye s’omai? Whaọ enẹna Jihova o bi ti fi uye họ uzou ra!’ Fiki oyena ahwo kpobi a tẹ rehọ itho fiei avọ uviuwou riẹ kpe. Kọ oyena u gbe dhesẹ nọ oware nọ orọ omai hi ma rẹ rehiẹ hẹ?

Oke ofariẹ Izrẹl tẹ nya e wariẹ họre Ai. Oke nana Jihova o te fiobọhọ kẹ ahwo riẹ, a tẹ kparobọ ẹmo na.