EME ru igbẹhẹ Jeriko enana kie? Owọhọ ẹsenọ ebọmbo ologbo jọ okiai. Rekọ eva edẹ eyena awo ebọmbo ho; a wo iresa dede he. Igbunu Jihova o fa orrọ! Jọ ma wuhrẹ epanọ orọ via.

Gaviezọ kẹ onọ Jihova ọ ta kẹ Joshua: ‘Whẹ avọ ezae egbaẹmo ra wha nya okpẹwho na wariẹ. Wha nyae wariẹ ẹdẹ ẹsiẹvo eva edẹ ezeza. Wha etehe-ọvọ na lele oma. Izerẹ ihrẹ erẹ karo kẹe yọ a bi kporo enware rai.

‘Eva ẹdẹ avihrẹ na wha vẹ nya okpẹwho na wariẹ isiahrẹ. Kẹsena whẹ vẹ kẹ edo enware na lelele, re who rua’i kpobi bo uboẹmo ruaro. Ugbẹhẹ na u ve ti kie te otọ pala!’

Joshua avọ ahwo na a te ru epanọ Jihova ọ ta na. Nọ a jẹ nya, yọ ai kpobi afọ. Omọvo ọ ta ẹme ọvo ho. Oware nọ who re yo ọvo họ edo enware gbe ithihi awọ. Ewegrẹ ahwo Ọghẹnẹ eva Jeriko ozọ u re ti mua’i hrọ. Whọ be sae ruẹ ufi owawae jọ nọ ubi veghe no unwido jọ ze? Unwido ono o ye? Ẹhẹ, Rehab o ru oware nọ ekiotọ ivẹ na a ta kẹe nọ oru. Uviuwou riẹ kpobi erọ eva bi leliei roro.

Uwhremu ẹdẹ avihrẹ na, nọ a nya okpẹwho na wariẹ isiahrẹ no, enware na i te do, ezae ohọre na a tẹ koyẹ, igbẹhẹ na i te ghelie kie. Koyehọ Joshua ọ tẹ ta nọ: ‘Kpe ohwo kpobi eva okpẹwho na jẹ mahiẹe. Ma he eware kpobi. Wha se idọlọ, irro, ekpọ na, gbe itehru ba, jọ a fiai họ ẹkpa ọ rọ uwoudhu Jihova.’

Rọkẹ ekiotọ ivẹ na, Joshua ọ tẹ ta nọ: ‘Wha nya kpohọ eva uwou Rehab, re wha rehiẹe avọ uviuwou riẹ kpobi via.’ Rehab avọ uviuwou riẹ ọvo azọe, nwane wọhọ epanọ ekiotọ na eya rọ kẹe.