RRI ibi nọ ahwo nana a be wha na. Rri epanọ ẹwhale ego ọyena ọrro te. Imava eye erẹ sae rehọ uroviẹ whae. Je rri fig na gbe pomẹgraneti na. Bovẹ ibi iwoma enana inọze? Obọ otọ Kenan inọze. Kareghẹhọ, Kenan họ oria nọ Abraham, Aiziki gbe Jekọp a jẹ ria okejọ. Rekọ fiki ohọo nọ ojọ o be Jekọp, avọ ekru riẹ, a te kpobọ Ijipti. Rekọ enẹna, ikpe wọhọ 216 evrẹ no, Mosis o te bi su Ahwo-Izrẹl zihe kpobọ Kenan. A tẹze nya te oria nọ a re se Kedẹsh evaọ igbrẹwọ na.

Ahwo oyoma a be ria evaọ otọ Kenan na. Fikiere Mosis o te vi ekiotọ 12, ọ tẹ ta kae nọ: ‘Wha gwọlọ riẹ unu ahwo nọ a be ria obe, gbe epanọ a ga te. Wha gwọlọ riẹ sọ otọ na u re woma ekakọ. Wha vẹ jẹ wha ibi jọ zihe kpozi.’

Okenọ ekiotọ na i zi he ze obọ Kedẹsh, a tẹ ta kẹ Mosis: ‘Ẹwho na ọghinẹ rọ ziezi.’ Re a kẹ imuẹro riẹ, a te dhesẹ ibi na jọ kẹ Mosis. Rekọ 10 ekiotọ na e tẹ ta nọ: ‘Ahwo nọ arọ obe, a rẹ ruaro, a tẹ jẹrẹ gaga. A re kpe omai no, otẹrọnọ ma tẹ dao nọ ma rẹ rehọ otọ na.’

Nọ Ahwo-Izrẹl ayo onana ozọ u te mua’i. ‘Ma he whu evaọ Ijipti, hayo tubọ evaọ obọ igbrẹwọ obonẹ, oye ohẹ mai woma,’ ere a tae. ‘A re ti kpe omai evaọ ẹmo, a ve ti mu eyae gbe emọ mai rehọ. J’oma sanọ osu ọkpokpọ fihọ ẹta Mosis re ma zihe kpobọ Ijipti.’

Rekọ imava ekiotọ na afi eva họ Jihova, a tẹ daoma re a whrehe ahwo na. Edẹ rai họ Joshua gbe Kelẹb. A ta nọ: ‘Ozọ umu owhai hi. Jihova ọ rọ kugbe omai. Ẹrehọ otọ na ọ rẹ tejọ lọlọhọ.’ Rekọ ahwo na ayo ho. A tubọ gwọlọ kpe Joshua avọ Kelẹb.

Onana o tẹ lẹliẹ Jihova muofu gaga, ọ tẹ ta kẹ Mosis nọ: ‘Ahwo kpobi nọ arọ, no umuo ikpe 20 kpehru ọvuọvo rai o re te otọ Kenan na ha. A ruerẹ eware igbunu nọ me ru evaọ Ijipti, jegbe evaọ obọ ẹwọ, rekọ afi eva h’omẹ ghele he. Fikiere a re ti ghoro evaọ igbrẹwọ ikpe 40 bẹsenọ ohwo nọ ọ kemu o re whẹ. Joshua avọ Kelẹb ọvo a re ti te obọ otọ Kenan na.’