RRI idodo na gbe ibi ọ almọn ewawae nọ e dhẹ no ọkpọ hayo ubro ure na ze. Ọnana họ ọkpọ Erọn na. Idodo enana gbe ibi ewawae na, e dhẹ no ọkpọ Erọn ze evaọ aso ọvo ọvo! Jọ ma ruẹ onosoriẹ ze.

Ahwo-Izrẹl aghoro kri no evaọ igbrẹwọ. Ahwo na jọ a roro nnọ u gbe fo re Mosis ọ gbẹ jọ osu hu, hayo Erọn ọ gbẹ jọ ozerẹ ologbo ho. Korah yọ ọ jọ nọ o je roro ere, ere ojọ kẹ Dethan, Abairam, gbe isu 250 ahwo na re. Enana kpobi a nyaze a tẹ ta kẹ Mosis nọ: ‘Fikieme who je ru oma ra kpehru vi omai enọ ikiọkọ?’

Mosis ọ tẹ ta kẹ Korah avọ ilele riẹ nọ: ‘Ohiohiẹ odẹ wha tọlọ imido-idhe re wha fi insẹnse họ eva rai. Re wha nyaze obọ uwoudhu-egagọ Jihova. Ma rẹ te ruẹ e nọ Jihova ọ te jẹ.’

Okiokiọ riẹ, Korah avọ ilele 250 riẹ a tẹ nyaze obọ uwoudhu-egagọ na. Amọfa buobu a nyaze re a fiobọhọ kẹ ahwo ọnana. Ofu o temu Jihova gaga. ‘Wha nyano iwoudhu ikpehre ahwo ọnana no,’ ere Mosis ọ tae. ‘Wha rehọ obọ te oware rai ovuovo ho.’ Ahwo na a te yo, a tẹ nya no iwoudhu ọ Korah, Dethan gbe Abairam.

Kẹsena Mosis ọ tẹ ta nọ: ‘Eva onana wha jẹ te riẹ ọnọ Jihova ọ sanọ. Otọ na u re ti rovie, ovẹ lọ ikpehre ahwo ọnana.’

Nọ Mosis ọ nwani ku ẹme họ no, otọ ute rovie. Uwoudhu Korah avọ ekwakwa riẹ gbe Dethan avọ Abairam gbe enọ ejọ abọ rai kpobi a tẹ ruọ otọ, otọ u te sigbe rura’i. Okenọ ahwo a yo unubo enọ ibi kporo ruọ otọ, a te bo nọ: ‘Wha dhẹ! Otọ na o sae lọ omai re!’

Yọ Korah avọ ilele 250 riẹ a gbẹ kẹle uwoudhu-egagọ na. Fikiere Jihova o te vi erae ze, etẹ mahai kpobi no. Kọ okioye Jihova ọ ta kẹ Ẹlieza ọmọzae Erọn re ọ tọlọ imido-idhe erọ ahwo owhuowhu na, re ọ rehai ru ururu ovẹvẹ kẹ umukpẹ aruẹri na. Ururu umukpẹ aruẹri onana, kọ orẹ jọ unu-ovẹvẹ kẹ Ahwo-Izrẹl inọ ute no Erọn avọ emezae riẹ no, omọfa ọvuọvo ọ rẹ jọ ozerẹ kẹ Jihova ha.

Rekọ Jihova ọ gwọlọ rue’i vẹ gaga, inọ Erọn avọ emezae riẹ enọ ọha no na a rẹ jọ izerẹ. Fikiere ọ tẹ ta kẹ Mosis nọ: ‘Jọ osu ọrọ orua ọvuọvo Izrẹl ọ rehọ ọkpọ riẹ ze. Jọ Erọn ọ rehọ ọkpọ riẹ ze, rọkẹ orua Livae. Re whọ rehọ ekpọ enana ọvuọvo fihọ evaọ uwoudhu-egagọ na, evaọ aro ọrọ okọ ọvọ na. Ọkpọ ohwo nọ mẹ ha fihọ ozerẹ ọ rẹ te dhẹ idodo.’

Okenọ Mosis oriwi okiokiọ riẹ, eme jọ, idodo enana edhẹ no ọkpọ Erọn ze gbe ibi ọ almonds ewawae! Kọ enẹna whọ ruẹ onosoriẹ nọ Jihova o je ru ọkpọ Erọn dhẹ idodo?