RRI Samuẹle nọ obi ku ewhri ku uzou ọzae na. Onana họ onọ a jẹ hai ru ohwo nọ u re dhesẹ nọ a sale riẹ wọhọ ovie. Jihova ọ ta kẹ Samuẹle nọ oku ewhri ku Sọl uzou. Yọ obọdẹ ewhri nọ ore gbo ore-awere.

Sọl o roro nọ owoma te epanọ a sae rọ rehiẹe mu ovie he. Ọ tẹ ta kẹ Samuẹle nọ, ‘Mẹ ọ rọ orua Bẹnjamin, onọ omae kao eva Izrẹl. Fikieme whọ jẹ ta nọ mẹ rẹ te jọ ovie?’ Sọl ọwere Jihova keme o bru omorro ho hayo ọnọ ọmae rọ ojaha. Oye jabọ nọ Ọ rọ saliẹ re ọ jọ ovie.

Rekọ Sọl ọ jọ oyogbere hayo ọzae kakao ho. Uviuwou ọdafe o noze, o te je wo erru ziezi, ọzae thethei. Ọ rehọ uthethei evawọ thei vi ohwo kpobi eva Izrẹl! Sọl ọ rẹ mae dhohrẹ vẹrẹ re, ọ tẹ jẹ ga thesiwa. Ahwo na a tẹ ghọghọ fiki nọ Jihova ọ ha Sọl re ọ jọ ovie. A te muhọ ebo nọ: ‘Ovie na ọ ria kri!’

Ewegrẹ ahwo Izrẹl a gbẹ re gaga epa anwọ ẹdẹ. A gbẹ be rehọ ukpokpoma rọ kẹ Ahwo-Izrẹl. Nọ a nwane rehọ Sọl mu ovie no, Ahwo-Amọn a tẹ nyaze te họrae. Rekọ Sọl o te koko ogbaẹmo ologbo, o te fi Ahwo-Amọn na kpare obọ. Onana u te ru ahwo na ghọghọ nọ Sọl ọ rọ ovie.

Epanọ ikpe eberọ nya vrẹ na, yọ Sọl ọbe hai fi kpare obọ vi ewegrẹ rai. Sọl owo ọmọzae ọwharo jọ nọ a re se Jonatan. Yọ Jonatan o fiobọhọ kẹ Izrẹl kpare obọ emo buobu. Ahwo-Filistia na a gbẹ rọ ewegrẹ nọ emai yoma rọkẹ Ahwo-Izrẹl. Ẹdẹ ọvo jọ idu gbe idu Ahwo-Filistia a tẹ nyaze te họre Ahwo-Izrẹl na.

Samuẹle ọ tẹ ta kẹ Sọl nọ ọ hẹrẹ bẹse nọ ọ rẹ nyaze ti dhe idhe, hayo okẹ, rọ kẹ Jihova no. Rekọ Samuẹle ọ gbẹ kake nya ze he. Ozọ u te mu Sọl inọ Ahwo-Filistia a bi ti mu ẹmo họ no fikiere ọyọvo o te br’oma nyai dhe idhe na. Ukuhọ riẹ nọ Samuẹle ọ te rọ nyaze, ọ tẹ ta kẹ Sọl nọ ọ be hai yo ẹme he. ‘Jihova ọbe te ha omọfa ro mu ovie rọ kẹ ahwo Izrẹl,’ ere Samuẹle ọ ta.

Ẹse ọfa riẹ Sọl ọ gbẹ jẹ wariẹ yo ẹme he. Fikiere Samuẹle ọ tẹ ta kẹe nọ: ‘Ufo re who yo ẹme kẹ Jihova viọ okẹ orọ emamọ ogodẹ nọ whọ rẹ rọ kẹe okẹ. Keme nọ who bi yo ẹme kẹ Jihova ha na, Jihova o gbe bi ti kru owhẹ wọhọ ovie Izrẹl he.’

Ma rẹ sai wuhrẹ emamọ oriruo rehọ no onana ze. Udhesẹ epanọ orọ oja te re ayo ẹme kẹ Jihova ẹsikpobi. Erere, udhesẹ nọ ohwo nọ owoma, wọhọ epanọ Sọl ọjọ, ọ rẹ sai nwene ze oyoma. Ma gwọlọ zihe ze oyoma ha, ma gwọlọ?