JESU ọda oma ji re o s’erri họ evaọ akotọ ozae obọ Sameria. Yọ ilele riẹ a kpo obọ ẹwho no nyae dẹ emuore. Aye nọ Jesu ọ be tẹme kẹ na ọ nyaze ame ovo. Ọ tẹ ta kẹe nọ: ‘Kẹ omẹ ame da.’

Onana u te gbe aye na unu gaga. Kọ whọ riẹ onọ osoriẹ? Fiki epanọ Jesu ọ rọ ohwo i Ju, ọye kọ ohwo Sameria. Ahwo Sameria a rẹ were ahwo i Ju buobu eva ha. A rẹ tubọ ta ẹme kugbai dede he! Rekọ Jesu o you oghẹrẹ ahwo kpobi. Fikiere ọ tẹ ta nọ: ‘Orọnikọ whọ riẹ ọnọ ọyare owhẹ ame na oyo, whọ hẹ yariẹ ọ hae k’owhẹ ame nọ ọ rẹ kẹ uzuazọ.’

Aye na ọ tẹ ta nọ: ‘Baba, ozae na u re kokodo, who gbe je wo ogẹgẹ gbe he. Bovẹ who je ti wo ame nọ ọ rẹ kẹ uzuazọ na?’

‘Otẹrọnọ whọ da ame ozae onana uruame orẹ wariẹ owhẹ kpe,’ Jesu o ru riei vẹ. ‘Rekọ ame nọ mẹ rẹ kẹ na ọ rẹ sai ru ohwo ria bẹdẹ bẹdẹ.’

Aye na ọ tẹ ta nọ: ‘Baba, k’omẹ ame ọnana! Re uruame o gbẹ wariẹ omẹ kpe he. Mẹ gbẹ jẹ nyaze ame ovo etenẹ ofa ha.’

Aye na o te roro nọ ame gheghe Jesu ọ ta ẹme kpahe. Rekọ ọ be ta ẹme kpahe uzẹme Ọghẹnẹ gbe uvie riẹ. Uzẹme onana owọhọ ame nọ ọ rẹ kẹ uzuazọ. Orẹ sae kẹ ohwo uzuazọ ebẹdẹ bẹdẹ.

Koyehọ Jesu ọ ta kẹ aye na nọ: ‘Nyai se ọzae ra re who zihe ze.’

‘Me wo ọzae he,’ ere o yo.

‘Whọ riẹ yo,’ ere Jesu ọ tae. ‘Rekọ who wo ezae isoi vrẹ no, ọzae nọ whẹ aviẹ agbẹ rọ enẹna yọ ọzae ra ha.’

U te gbe aye na unu, keme enana kpobi uzẹme. Kọ ẹvẹ Jesu ọ rọ riẹ eware enana? Ẹhẹ, keme na Jesu họ Ọnọ Ayaeya riẹ nọ Ọghẹnẹ o vi ze, Ọghẹnẹ ọ tẹ kẹe eriariẹ enana. Kọ oke onana ilele Jesu a ro zihe ze, u te gbae unu fiki epanọ ọ be ta ẹme kẹ aye Sameria.

Eme ma wuhrẹ no onana kpobi ze? Udhesẹ nọ Jesu o you ahwo kuyẹ kuyẹ kpobi. Yọ ufo re ma jọ ere re. Ma re roro nọ ahwo jọ họ ahwo oyoma ha fiki nnọ arọ ahwo uyẹ jọ. Jesu ọ gwọlọ nọ ahwo kpobi a riẹ uzẹme nọ u re su kpohọ uzuazọ ebẹdẹ bẹdẹ. Yọ ma rẹ gwọlọ fiobọhọ kẹ ahwo re a riẹ uzẹme na re.